August 26, Inrinni zinga Serchhip khawpuia political party zawm bik nei lo, ram veite inhmu­khawm chuan Zoram Exodus Movement (ZEM) an din.
July 6, 2017 khan Aizawla ZEM hotute chuan Serchhip hi an tlawh a, thuthar thehdarhtute nen inkâwmin, Serchhipah ZEM din turin thutlukna an siam. Inhmuhkhawm ṭum hian convener pathum - Kapliana Pachuau, Lalawmpuia Renthlei leh Jerry Lalrintluanga te ruat an ni.
Convener-te hian Ser­chhip khawpuia pro­minent citizen hrang hrangte kâwm kualin, August 26 zing hian ZEM an din ta a ni. Hruai­tu atan president-ah K Chawiliana, vice presi­dent-ah Lalchhara leh Lalbiakliana, secretary-ah Kapliana Pachuau leh treasurer-ah Lalawmpuia Renthlei-te an ruat.
Serchhip ZEM presi­dent K Chawiliana chuan, Pathian leh a kohhran tana rinawmna aia party-a rinawmna dah pawi­mawh zawk a ni ṭhin chu ngaimawhawm a tih thu a sawi a, "Serchhip ZEM hi chuan Pathian leh kohhran duh danin ram siamṭhat hna a thawk dawn a, kohhran mipui leh rawngbawltute telna tlak a ni ang," a ti. 

Post a Comment

Powered by Blogger.