Let my people go (Exodus 9:1)
– Rev. Dr. K. Thanzauva
Kum 2016 kum thar tukah thu ka sawi dawn a. Pathian hnenah thuchah dilin ka tawngtai a. Hun rei tak kal a, ka tuipui em em Exodus chu ka rilruah a nung thar hle a. A tirah Mizo Exodus tiin ka ngaihtuah a, mahse a zau lutuk a, tichuan MIZORAM  ECONOMIC  EXODUS tiin kum thar tukah chuan Sermon ka sawi a. Ka rilruah a nung reng a, kawng hrang hrangin, hmun hrang hrangah ka sawi a. Exodus a tulna chhan chu tuna kan dinhmunah kan lungawi lova, tichuan vision kan nei a, chu vision chuan kan saltanna atang kal chhuak a, ramtiam pan turin min nawrchhuak thin a ni.




ZORAM VISION:  Pu Rokunga chuan “Kan ram mawi chullo la parin vul leh zual la, thangthar hmatiang sawnna tur khua sei leh se” a ti a.  PRISM ho chuan Corruption Free society an thlir a, MNF  chuan Independent Zoram an lo thlir tawh thin a,  tunah tak chuan Zoram hmasawnna tur SEDP an siam a. ZNP chuan Mizo Nationalism tundin an tum a. ZDF chuan Decentralization an buaipui a. Zoramthar ho chuan theocracy an buaipui a. Congress ho chun NLUP chhun-zawmnan NEDP an buaipui a. PC ho chuan Zoram intodelh nan Six Basic Needs an buaipui a, kan vai hian HMASAWNNA ZORAM (Developed Mizoram) hi kan thlir a, sawi dan kawng hrang hrang in kan sawi mai a ni. Heng zawng zawng hi la khawmin: Dikna, Hmasawnna, Lungrualna, Chullo tur Zoram (DHLC)ka ti ve ngawt a ni.
RAMTIAM (THE PROMISED LAND): He kan Zoram hi chhengchhe hle mahse kei ni zofate tan chuan Ramtiam ( Promised Land) a ni. Run leh Tiau lui kanin he ramah hian Lalpan min hruailut a, min humhim a ni. China leh Myanmar ramah lo chambang ila chuan hnehchhiah leh awpbehin kan awm ka ring. Tripura leh Assam phaitual  thleng thla ila hnehchhiah leh awpbehin kan awm ka ring. Chanchin Tha dawng  lo ila chuan Hindu hnamchhia Dalit kan nih ka ring. Kan Missionary ten Chanchin Tha min hrilh a, Kristian kan ni a, Lehkha min zirtir a- India Sawrkar tha tak hnuaiah District Council neiin, UT ni a inzir chho zelin State hial kan ni hi Lalpa ven himna leh malsawmna a ni a. Lalpa kan Pathian, kan Mis-sionary-te leh kan ram hruaitute hnenah lawmthu ka sawi a ni. Lalpa remruat dan hi a makin a ropui.
ZOFATE SALTANNA: Kum 1972 UT kan ni atangin kum 45 mual a lo liam ta reng mai. Chutih rualin technological revolution in min man a, globalization in min rawn chim ta bawk si a. Hmalam pan a chak taka kal a tul laiin, kal ngaihna hre lo hian kan buai em em ni hian ka hmu a. Kan hruaitute thu neihna inchuhin an in chirhtheh vak vak mai ni hian ka hri a. He ramah hian salah kan tang a ni. 1) Dependency (vehburkhawn economy) salah kan tang, 2) Subsistent economy (tlachawp economy) salah-ah kan tang reng mai, 4) Party politic salah kan tang, 5) Politicalized education salah kan tang, 6) Ruihna bawiah kan tang, 7) Moneycracy (Sum salah) kan tang.

EXODUS: HETA TANGIN I KAL CHHUAK ANG U.
SUM BAWI ATANGA CHHUAK IN DEMOCRACY AH I LUT ANG (FROM MONEYCRACY TO DEMOCRACY): India independence khan kan Lalte ban in Democracy (Mipui rorelna Sawrkar) kan lo nei ve ta a. Kum 1952- 2017 kum  65 mual a lo liam meuh chuan Democracy kha Moneycracy-ah a chang ta der mai. Tichuan POLITICAL VICIOUS CIRCLE ah kan tang ta a ni. Tunah political revolution kan mamawh a ni. Tunah hian sum seng vak lova in candidate ngam kan zawng a ni.
Khawvel politic dang lam chu hetiang deuh hi a ni: 
1) Theocracy: Sakhaw rorel hun a liam ta, mahse Muslim ram then khat chuan an la hmang tho;
2) Autocracy/Monarchy: Mimal lal rorelna hun pawh a liam, mahse hmun then khatah la hman a ni;
3) Oligarchy: Hmun then khatah thiltithei leh mithiam intelkhawmin ram an hruai baw;
4) Democracy: Mipui rorelna hun a lo thleng ta. Zoram ngei pawhin kum 65 kan hmang ta;
5) Plutocracy/Moneycracy: Tunah chuan Democracy chu Moneycracy-ah a chang zo ta. He sal atanga tal chhuah hi a tul a ni.
JUBILLEE SALCHHUAH DAR TUM ANG U: Kum 2018 Elec-tion-ah hian Jubilee dar i tum ang. Moneycracy sal atanga chhuakin, khawvel hian mak tiin Lalpa ropui zia an hmu dawn a ni.

Post a Comment

Powered by Blogger.