Lalrammawia
Mizoram Science Centre
An lo muk in an in hiptawnna pawh a nasa zel a, tichuan nghet takin pumkhatah an lo insiam ta a. Pumkhat a boruak (gas) leh dust particles- te an insiam takah chuan an lo intel ruhin, an inhnimhnai ta bawk a, an temperature pawh Gas Law (Gas dan) zawm tlatin a lo sang hret hret a ni. Gas law ah chuan, “thil kan nemmuk chuan an lo sa sawt a, a chhan chu an lo inhnimhnai em vang a ni” a ti a. (Anything that is compressed becomes hotter because of increase molecular interaction). Temperature hi sang tak, maktaduai sawm (10 million) °C -te a thlen phei chuan.Thildanglam tak nuclear fusion reaction kan tih hi lo thlengin hydrogen atoms te chu anmahni leh mahni inbelhbawm (fused) in boruak chi dang Helium a lo piang ta a. Meialh hlawm kang hluah hluah reng an nih avangin boruak ah pawh a zang ber chi Hydrogen te hi Helium -ah inlet in Nuclear fusion reaction a awm reng a ni.
He Nuclear fusion avang hian tha chakna (energy) chi hrang tam tak, entirnan Ultra violet radiation,Visible light etc te an lo pianchhuah phah ta a. Pumkhat-a insiam boruak (gas) leh dust particles te hi meialh hluah hluah ang mai an ni a. An sa em em a, an lairil (core) temperature a zirin kawng hnih an zawh leh tlangpuia, chungte chu: 1) Proton-Proton Reaction Ni(Sun) a awm ang leh, 2) Carbon-Nitrogen Cycle arsi sa tak tak (hotter star) a awm ang te khi an zawh ta thin a ni. Mak ve deuh mai chu Arsi te khian nang leh kei ang hian damchung hun hmang ve in an piang a. Vanglai hun an hmang a, an thi ve thin a ni. Zan a arsi I hmuh thin tam tak te pawh khi engtik hunah emaw chuan an la thi ve ngei dawn. Lal remruat a ni tuman kan hnial theilo.
Kei ni pawhin kan pawnlam landan (Physical appearance) azirin naupang, puitling, pitar putar kan hre mai thei ang deuh hian, Arsite pawh hi an rawng (colour), lenzawng (size), en dan (brightness) azir te hian an upat leh upat loh (age), sat leh sat loh (temperature) te, engemawchen chu a hriat ve theih a ni.
Entirnan: Arsibawr (constellation) lar tak pakhat Orion chhungah hian Arsi Rigel a awm a. Lei (Earth) atang han en mai chuan a rawng hi a pawl (bluish) ram a, arsi sa tak (hot star) leh, arsi naupang (young star) lam tihna a ni. Rigel bul lawkah hian Mizo pawhin a kan hriat lar tak Sikeisen (Betelgeuse, Planet Mars a nilo!) arsi sen rem mai a awm leh a. Arsi sa lutuk hran chu a ni tawh lo, a pawnlang sat lam (surface temperature) hi 2000 °C a ni, tui (water) so bawrh bawrh hi 100°C vel a ni a, tui so let 20 lai a sa a nih chu!. Arsi upa lam (old star or red supergiant) niin, a damchhung hun hnuhnung lam a hmang mek bawk.
Sikeisena (Betelgeuse) piah deuh lawkah hian Lei atanga arsi eng ber a sawi (brightiest star) Sirus or Dog star a awm leh a, Sirus hi a eng (yellowish) deuh ram a, Nguntaka han thlir vang vang pawh hian arsi eng tak anih hi hai rual a ni lo. Mithiam ten an han zir chian meuh chuan Ni (Sun) ai in a let 26 laiin, awiawmloh khawpin a eng fe zawk a ni. Lei atang a Eng kum (Light year) 8.7 lai hla a awm a nih avangin a enzia kan hre lo mai zawk a ni.
Post a Comment