UNIVERSE & ARSI CHUNGCHANG

Lalrammawia

Mizoram science centre

I van i kut chhuakte, Thla leh arsi i ruathote te khi, ka ngaihtuah chang chuan, ‘Mihring hi engemaw a niha, i hriat reng thin ni? Mihring fapa pawh hi enge maw a niha, i kan thin ni?’ ka ti thin. A ni chu Pathian aia hnuai deuh chauhvin i siam a, Ropuina leh chawimawina i khumtir si a.(SAM No 8 :3-5)

Lal Davida hian universe lo ropuizia hi a hmuchiang hle mai. Van khi Pathian ropuizia puang chhuaktu a ni reng a. Van lam hmun zau tak ni leh thla, simeikhute leh arsi tluklehdingawn tam tak awmna hmun chu Universe(Vanthengreng or Vanlawt) a ni.

Miss universe thlanna ropui tak tak neih a nih thin hi kan hre theuh awm e. He lei (world) piahlam, ni leh thla leh arsi -a cheng zawng zawng (?) a huap a nih chu!

Vanlam chanchin zirmi(astronomer) tam zawkte chuan kum tluklehdingawn 15 vel kal ta khan thil puak a zawnga puak ropuiber a thleng an ti a, chu chu Big Bang tih a ni.. Big Bang hma hian hun (time) hi la awm lo hrim hrimah an ngaih a ni. Big bang hi hun(time), space leh universe lo pianna bul pakhat a ngaih a ni. Universe piang tir chu a tet bakah sawithiam phak bakin a sa(hot) a. Tichuan, thawk lehkhatah hampuar ang maiin a lian ta sawt sawt a. Hei hi Inflation an ti a.

Tha chaktak (Super force) chu pheldarhin a awm bawk a. Inflation hian matter leh antimatter particle an tihte chu intluk tlangin a siam a. Matter leh animatter te hi inhal leh ineiral tawn an ni a. Universe pian hlimte a an ineiral vek lohna chhan pakhat chu X boson leh anti-X vang nitein thankhat chuan an ngai.

Universe pian hlim minute thum chhung lek hian universe sa tak chuan vawhlam a pan chak hle a. Matter leh antimatter te in beihnaah matter te chuan dinhmuntha an luah ta zawk a. Reilote hnuah chuan Quarks te chu Innei tawn (clumped together) in Proton leh Neutron te an siam ta a. Tichuan, proton leh neutron te chuan Atomic nucleus an piantir a. Chumi hnuah atom zinga pawimawh tak Hydrogen atom, Helium atom te a rawn piang ta a ni. Tunah hian universe hi a piantirh ai khan a vawt in, puar lian hret hret ah mithiam te chuan an ngai bawk.

Tichuan, ni, thla, planet leh arsite pawh rawn piang ta a ngaih a ni. Amaherawhchu, Ringtu te chuan universe zawng zawng hi duhtaka Pathian siam vek a nihzia kan hre thung a. Hei hian science hi a kalh tihna ani lo. Science zawng zawng pawh hi pathian siam vek an ni a. mihring te thawh chhuah a tan leh hmuhchhuah atan hian pathian hian a dah teuh zawk mai ani. Entirna pakhat lek han sawi ta ila. Pathianin mihring te hi vaivut atangin a siam niin Bible chuan min hrilh a. Science zirna peng pakhat Astronomy atang chuan Mihring te hi arsi thi tawh te vaivut atanga lo piang chhuak vek kan ni a ti a ni. Ngaihdan leh pawm dang chi hrang hrang erawh atam khawp thung.