Mizo pasalthate lungkham ram, sa chitin reng awmna, thingzara zawng, hauhuk leh ngau an phut suau suauna hmun, phula ramsa chetla suau suau mai te chu hmuhnawm tham a ni a; ngaw thing kara nauban chi hrang hrang par vul mawi lutuk te chuan Buannel ram hi ati ropui zual hle. Nauban mai bakah Chhawkhlei par, January thla atanga May thleng ngawt mai par vul chuk mai i hmuh chuan i rilru kamtu, uai rittu zawng zawng kha a bo vekin ka ring.
Hmangaih berte nena len dun nan hmun duhthusam a tling a, hmangaih berte tel lo erawh chuan hmun khawharthlak leh lunglen kaithotu a tling thei ang. A chhan chu a hmuna buannel par te, dingdi par mawi te hian i lunglenna an kaitho anga, chutihlaia i kianga i ngaihzawng awm si lo chuan i khawharna leh lunglenna a kaitho ngei ang.A awmna hmun hi Tiau lui leh Run lui inkar, kan pipute lo tualchaina hmun Lêntlânga awm a ni a, Lêntlâng hi kum 1900 hma lam kha chuan Mizoram chhunga rin luh a ni a, mahse Brtish sawrkar hnuai atangin India leh Burma te’n Independence kan hmuh khan Tiau lui khi India ram leh Myanmar inrina atan hman a ni ta a ni.
Lentlang ram awmdan chu chhim leh hmar zawnga inkhawh a ni a, tlang sang tawk tak 8500fit laia sang inkhawh zui mai karah chuan hmar lam epah hian ngaw dur khung mai a awm a, phul nen a inhne rial mai a ni. Khawchhak lam aiin khawthlang lam ram a sang zawk a, Buannel hmar lam hi leilet siamna atana hmun rem tak niin fur laiin tui a luang dam dam thin.
Buannel ram chhunga phul zau zawng hi mel hnih leh a chanve zeta zau a ni a, ngaihzawng, chhungkhatte leh thianthate nena selfie nana hmun duhthusam a tling. Ngaihzawngte nen ngat chuan kut insuih riala tudang ngai miah loa len dun nan hmun duhthusam a tling hliah hliah a, ‘tawka’ a leng chum chumin in hria ang. January thla leh May inkara in kal a nih chuan chhawkhleiparte kha han inthliah ula, kha hmun kha in hre rei lehzualin a rinawm.
Buannel phul kha han fang kual zel la, a phul hmar lamah khan mak ve mai mai takin Adama leh Evi thlan tlang i hmu anga, Chawngtinlerhi puan tahna tlang te, Sailungvar keh them i hmu ang.
Buannel hmuchhuaktu nia an sawi chu Pu Zakhala a ni a, Pu Zakhala ramvak chuan Buannel hi a han pawh hlawl a, a han hmuh chuan ramsa chi hrang hrang a lo tam em em mai a, kah ber tur pawh hre lovin a silai chuan a tin zat zat mai a ni awm e. Khua chuan a rawn thim hnan ta a, lei kawrawng chhungah chuan a tawm ta a, zan tirah chuan atawmna lei kawrawng chu a thawl tha ngang mai a, mahse zan a rei tial tial a, a tawt tial tial a, a ngaihtha lo chu a zana zan chuan a haw nal nal mai a ni.
Buannel tih hi ‘Ramsa tamna hmun’ tiin James Dokhuma chuan a hrilhfiah a, thenkhat chuan ‘Phul hnim nêm te te’ sawina a ni e, an lo ti bawk. Buan tih hi Tiddim lam tawng a ni a, Leidiak/kawi tihna Nel tih pawh hi chuti lam hawi deuh chu niin an sawi bawk. Hla thuh tawngkamah pawh Pu Ch. Malsawma leh Pu Remkunga te pawhin hla-ah an lo hmang tawh nghe nghe.
Kan pipute khan, ‘Sa zawng zawng hi Buannelah an lo piang a, Chawngtinleri’na siam,’ tih kha an lo rindan a ni a, Buannel phul chhim lamah hian ‘sabual’ hmun lei kawi diak a awm a, tah chuan ramsa chitin mai hi intibuai hauh lovin inbual turin an insul zut zut mai thin. Kan piputen Buannela sa zawng zawng an piang nia an lo ring kha an thiam lo hran lo.
He hmunah ngei hian han kal la, Camera I ken theihnghilh a nih erawh chuan pawi tiin I chek tlawk tlawkin ka ring. - Mizo Archive
Post a Comment