Chite lui humhalh tura hmalaknate sawihoin November 22, Nilaini chawhnu khan chief minister Lal Thanhawla hoin CMO Conference Room-ah sorkar hotute an ṭhukhawm a; Chite lui humhalh­na atana hmalak dan tur hrang hrang an ngaihtuah.
Meeting-ah hian minister pali - R Romawia, Lalsawta, Lal Thanzara leh KS Thanga te, deputy speaker R Lalrinawma, ZOHANDCO chairman R Vanlalvena, MLA leh Save Chite Executive Committee member-te an tel.
Chief Minister chuan, Chite lui humhalh dan tur sawihonaah hian Chite luiin a tan tlang Assembly bial MLA-te sâwm an nih thu a sawi a; Aizawl leh a chhehvelah mipui tan hawi khawthawnna tur hmun remchang leh nuam a tlem thu sawiin, "A awm chhunah pawh a mawina, natural beauty ti­chhe zawnga hmalak a ni fo a, a pawi hle a ni," a ti.
Chite lui leh lui dangte pawh humhalh âwm tak tak a awm nual thu sawiin Lal Thanhawla chuan, lui humhalh chu mi tin mawhphurhna a nih thu a sawi a; mimal hlâwk­na chauh ûmin hmasawnna a tihṭhuan­awp ṭhin thu a sawi bawk.
Meeting-ah hian, Save Chite Lui Coordination Committee hnuaia hmalak tawhnate leh hmalak zel dan tur sawiho a ni a; leivûng leh bawlhhlawh paih vanga tui a bawlhhlawh bakah, lui kuang a zîm phah tawh thute sawi lan niin, Chite lui dinhmun chu mipuiin zau zawka an hriat theih nan inhrilhhriatna ṭha neih a ṭul thute sawi lan a ni.
Chite lui chungchangah hian baseline survey neih a ni tawh a, University of Minnesota leh Mississippi Water Management Agency leh Mizoram University mithiamte'n an zir chian­g tawh bawk a; National Service Scheme (NSS)-in hna­tlangpui an huaihawt tawh bawk.

Post a Comment

Powered by Blogger.