YMA branch-te zaipawla an intihsiakna, Inter Branch YMA Zaipawl Intihsiak chu November 22, Nilaini zan khan Central YMA Hall-ah ṭan a ni a; YMA branch 21 an tel.
YMA branch-te zaipawla intihsiakna hi Central YMA leh NEIDA-in an buatsaih a ni a; hawnna inkhawm kaihruaitu YMA CEC member leh Organising Committee secretary Lalrinmawia chuan, intihsiakna chu faina leh thianghlimna lam hawia kalpui a nih thu a sawi.
Central YMA finance secretary Fabian Lalfakawma chuan, Mizote chu zaipawl uar hnam an nih thu sawiin, ṭhenawm ram leh hnamte lakah Mizote an chungnung rih hle niin a sawi a, "Zaipawla kan chungnun ang hian, lehkha zir thiamna lamah te, taimakna leh kawng hrang hrangah kan hnam hi sang takah dah tum ila, faina nen kan ram tan theihtawp chhuahin hma ila ang u," a ti.
YMA zaipawl intihsiakah hian branch 21 an tel a, Nilaini zan khan branch pali zaiin, nizan khan branch paruk an zai a; zaninah branch paruk an zai ang a, nakzanah branch panga an zai leh ang. December 5, 2017-ah Chanmari YMA Hall-ah second round ṭan a ni dawn a ni.
Intihsiaknaa pakhatnain Rs. 50,000, pahnihnain Rs. 30,000 leh pathumnain Rs. 20,000 an dawng ang. Inter Branch YMA Zaipawl Intihsiaka pakhatna ni lai chu Damveng Branch an ni.
-Vanglaini
Post a Comment