-Rev C. Lalbiakzuala
Hun rei tak atanga kan lo thir MBKHP Inkhawmpui chu kan lo thleng ta reng mai. Thlengtute inbuatsaihna a tha tawk a nih ka ring a. Thlen kim ni phei kha chuan khaw dung tluan mai kha a hmui rum rum mai a nih kha. Inkhawmpui lian thlen hi chan harsa tak, thlen hautak tak a ni a. Chutih rualin inkhawmpuia kalte leh a bik takin thlengtute tan tisa leh thlarauah malsawmna tam tak chan tur awm ve thin. Inkhawmpui Hlawhtling tak nei tur hian inkhawmpui dawltute leh mikhual ten thil pawimawh tak tak an hriattur a awm. Tisa lam inbuatsaihna tha tak, inkhawmpui khawro tak a awm thei a. Chutih laiin Chawhmeh bel hmui vak lem lo, inkhawmpui boruak nuam tak te pawh a awm thei bawk ang. Chuvangin inkawmpui hlawk thlak leh hlimawm kan neih theihna turin heng thu zawhna hi i han chhang dawn teh ang.
Engvangin nge inkhawmpui i kal? He zawhna hi Inkhawmpui chhimtute hnenah hian zawt ta ila chhanna a hrang nuai thei in ka ring deuh. Chuvangin i han chhan sak chhin mai teh ang.
Rorel Palai tura Ruat ka nih a vangin: Hei hi thil pawimawh taka a ni. Jerusalem inkhawmpuiah pawh khan thurel pawimawh tak Upa leh tirhkoh ten an nei a ni tih kan hmu. Amaherawh chu Hemi avanga inkhawmpui kal te hian rorelah tlingtlak zawh mai an tum ang tih a hlauhawm deuh. Program dang pawimawh tak tak theihnghilh thaka rorel hi a awm thei ang em? Rorelna ringawt ngai pawimawh tan phei chuan duh loh zawnga agenda an keuh tluk palh vaih chuan vui hmui pu in program a hmantluan thei mai ang tih hlauhawm tak a ni
Chhungte tlawh remchang: Hei hi khawmpui kal chhan pawimawh tak a ni ve fo thin. Khawmpui kal thahnemngaih deuh tum phei chuan pawimawh ve tak a ni. Heng hote avang hian unit palai kal report a tam phah ve tlat a lawm hle tur a ni. Mahse heng hote avang hian inpawlhonaah palai kal zat an chhiar tha leh thut ang tih a hlauhthawnawm thin. Heng ho hian inpawlhona program hi an kal kim lo chauh pawh ni lovin, chhungte tlawh kualna hun rem chang tak niin an hre ve tlat.
Tun tum chu lam leh vak mai teh ang: Pathian fak a lam hi a va han tha em? Kei pawh hi ka lam ve fo mai. Nuho inkhawmpuiah phei chuan “Het Sala” atanga “Haiden real” thlengin a leng vek mai a nih hi. Thlarau hnathawh hi mihring finna hmanga hriatthiam rual ni hek lo le. A then bungbu te, eu tlat te, vanlam kawk tlat te, saisir zawnga her tlat te, a lai a vir tlat te, leh a luma lum te thlengin Thlarau pek ang zelin chet han thawh leh teh ang hmiang maw! Hetiang hunah hian Taksa chetna neite pawh hian midangte tibuai lo tura an inven fimkhur a tul thin hle a ni. Lam tuala lam chhuak te hi a then kum upa lam te, damkawr te, tha na neite, khawhmuh fiah lote, tihrawl nghah tak te, pumna nei ngai lote, khawsik ngai lote, buh tin thum tlan pui thei te thlengin tualkhatah kan su tlang thin a ni si a. Mahni rilru a thil awm ringawt ngaih tuah lovin, midangte tana malsawmna ni chung zel in Lalpa fakin i lam ang u. Chutih lai chuan lam theihna Program chauh ngaisanga Program dang hmu rau lo riau hi nu ho zingah hian an awm leh pek mai angem aw! Ka ti deuh. Chungho tan chuan Seminar te, rawngbawlna pawimawh tak Chhawmdawlna In report te hi a ninawm duh ngawt ang.
Khaw hmuh zauna hun tha: Kawrthah nu hote, Vathuampui Nuho te tan chuan kan khawmpui neihna hmun hi an vawikhat kalna a ni mai thei. Khawmpui kal hian kan hmuh ngailoh min hmuh tira, kan hriat ngai loh min hriattir a, kan tawn ngailoh min tawn tir bawk. Hengte avang hian khawmpui kal hi hlimawm in a nuam thei hle. Hemi avang hian mi tam tak chuan khawmpui kal hi an thlulh phal lo niin kan hre leh ngawt a. Thenkhat Excursion kal emaw inti tawk te hi an awm ka ring leh pek tlat. Tum khat eng Inkhawmpuiah emawni pawh mihlui zaithiam thlan en in an tleh dul dul tawh kha. Khatiang ho kha chu an venga an haw veleh an program bawhpelh tak mai, hman dan kha Upa fir deuh ten lo zawt kauh se ka ti ngawt thin mai.
Uniform: He thumal in a sawitum leh a kawh hre mumal lemlo thingtlang nu tamtak chu he thumal vek hi inkhawmpui an kal chak nachhan anih ka ring leh tlat. Thingtlang nu vengva deuh chuan School lam pang thil a ni tih an hre mai thei a, chuvangin school lampang thil reng reng chu kan huam tir ve vek mai teh ang. Fate school kalna tur, school uniform, Text book, pen leh pencil thlengin nute ngaihtuahna ni a va han buai nasa thin em! Chuvangin thingtlang nu tan chuan saihlum pakhata sava pahnih perh thlak ang mai niin he inkhawmpui hun hi an ngai ve thei tlat. Amaherawh chu thildang tihpah tur nei reng chung a kal hma duh chuang silo, hawtlai duh chuang silo, hun laklawh a pandal chhuahsan zul zul ching an nih teh chuan leh! An chhuak ru lai an thla laksaka pandal banga tar a chakawm ngawt ang.
A nih leh eng ber chu nge inkhawmpui hlawhtlin theina khawp hial rilru nei a lokalte chu ni ang? Tih i lo ngaihtuah hman tawh em? Mari’n “ I thu ang zel in ka chungah thleng rawh se” tia a lo sawi rilru ang pu inkhawmpui palai lo kal hi an awm ang em le? He rilru pu tute hi an chapo thei lova, an duhdan aiin Pathian duh dan an ngaisang zawk a, tainei lam in an lam ngai lova, Chang sang zawk nih an in chuh ngai lo. Midang dipdal in an awm ngai lova, midangte tan malsawmna nih an tum zawk thin. An thian te mualpho ai an mualpho ngam a, midangte rel leh sawichhiatna an kaah a chhuak ngai lo. Khawvel nun nawmna leh sanna aiin Krista inngaihtlawmna nun an thlang zawk a, an pasalte eiru turin an fuih ngai lova, an eiruk bansan turin an tawngtai sak thin. An fapa te sual a zeppui ngai lova, sual do in an tawngtai tlaivar zawk thin.
He thu; a nun kaihruaitu hi Mari hian naupang Isua hnenah khan a lo hrilh thin em ni ang le? Kross thihna a hmachhawn lai meuh pawh khan Isuan “ Nangma thu ni zawk rawhse” ti a a lo sawi chhuah tak. Chumi avang chuan Isua nunah khan mualphona in awmzia a nei tawh lova, zahnain hmun a chang tawh lo. Kross thihna tuarpui tlak khawpa Isua nuna thuril leh hlu chu “Nangma thu ni zawk rawhse” tih hi a lo ni ta. Hei hi a ni Paula’n “ He rilru Krista Isuaa awm bawk kha, nangmahniah awm rawhse” tia a sawi chu. Inkhawmpui palai lokal zawng zawngte rilruah hian he rilru hi awm ta sela inkhawmpui hi a va nuam dawn em!
Post a Comment