– Thanga Chhangte


Naupan laia, ‘Kawl aw sen sen, ka fanghma aw tai tai’ eng teh chiam enghelh lova kan tih thin laite a, losul an lo hawng zung zung a, losul thereng-te an lo hram duai duai bawk nen, mi reng reng hi engthlawl hulh hian ka hre thin.Favang kawl a lo herchhuah leh meuh hi chuan, miti’n te hi kan rilru a lo thar in hun kal tawh hnute min hriatchhuah tir leh fo thin a. Nunhlui ngaih a zual leh thin. He hun hlimawm tak leh nuam tak lo herchhuak leh thin hi itin tan hian zalenna duhawm thlentu leh hlimna hun a lo ni kher mai. A mawina leh nawmna hre pha tan chuan hlimna hun ropui a va ni em!! Hei vang hi a ni ang, ‘Favang Awllen’ (Autumnal Leisure) an lo tih kher chhan pawh hi ni ang.

Lo lam hnapui thawktute pawhin, kawla ni chhuak chhiara an lo hnathawhte chawlhsan a, rilru engthawl tak leh hlimna hunpui Favang Awllen an hman ve hun a lo ni a. Lo lam kana nu ho chawhmeh la leh ramvak mite’n an lo lam chanchin an sep rawtui hluah hun a lo ni a. Engto tehchiam neilova awmte tan lah a nuam narawh. A lungleng mite’n tuma hriat lem hleih lova mahni sulhnute chhuikirin leh, hun hman dan turte suangtuah-a inngaihtuah lungleng in hun an lo hmang ve mek bawk a. A mawina leh lung min dumtu hrilhfiah sen rualloh a kan nun nawmna ava tling tak em.

Engkim mai hi a mawi zual ta bik emaw tih mai tur a ni a. Hram thiam rengtin thingtin zar awiin an lo kiu veng veng bawk a. Siamtu’n a duan anga thingpar chi te’n parmawi tak chhuahin an lo vul chi chiai hlawm a. Hnah hring no nghelh leh mawina te chuan thinlai a fan raih raih thin. Tlangtin mualtin han chuan ila, an mawina te hringfaleng zawngte tan a chhuah ve ni awm hrimin, lunglen a ti zual em em mai si. Thinlai mu hnu haitho in, tlai nilen a thlir a awl hial thin.

Zing nichhuak engmawi tak maiin a, zanlam a Maimawm te’n thlansa phul kaia an ei hmuh ve nana an rilzawm daifimin a bawh te an em tle siau siau leh, tlang ti’n ruam ti’n maia hnahte an chhun hring nghalh meuh hi chuan lunglen a ti zualin, engkim siamtu hian mihringte tan hian thilsiam ava han thiamin, a lova ropui tak em. Kan tana hlutna nei lem lova kan ngaihte pawh hian min lova tanpui nasa em tihte ngaihtuah chhuah chang a awm fo thin. A ni lah taka, kan tana tangkailo leh mawina reng neilo anga kan ngaihte pawh hian tangkaina mual an lo neiin, min tihlimtu leh lawmna min thlen sak tute an lo ni ve leh fo zawk thin.

Khua han chhuan ila, vanrang chhum leh engkim mai hian lung min len hliah hliah bik a. Zun tin zama uailo tan pawh, lunglenna thu han hrilhna tur nei lemlo na mahse, he hun meuh hi chuan tang laiah fanin dam man a awm hliah hliah hian a hriat chawk thin. A mawina ti zualtu chung chhawrhthla eng leh siar lengte pawh khi han thlir ila, lunglen zawng a hnem zo mawlh silo. Han vak kual ila, hmuntuin hmun tangah perhpawng chiri chiah chiah lo veh tawk lah bo bil lo. Chu a chhapah hramthiam dang te’n awrawl tawp tawp chhuahin an lo hram ve chel bawk nen, awm khawhar ava tisei thlawn em. Tu dang tang dang belh tur neilo mah ila, he favang kawl kumpuisul lo vei thin ah hian hringfate tana nuam leh mawi hi a herchhuak khat hle thin in a hriat bawk si. Hei vang hi alawm Pi leh Pu te pawh khan an lo thlakhlelh em em thin. Khuangchawi leh vhawng te kha an tanah chuan hunpui tak meuh a ni si a. Tumah in dip bil lova an hman thin avang khan, a mipui/mimir (Maltitude) khan nuam a lenga an hlimna hun ropui tak meuh a lo ni ve si a, an hun nghahhlelh ber a lo nih ve kha….
A ni, tlaitla eng mawlh mai hian lung a van kuai leh bik tak em. Kawl eng sen phatte, nungcha hram chiah chiahte hian leng zawng zingah lunglen a ti zual fo thin hian ka ring.

Tlangval Lalzova paw’n …
‘Makriak te’n ang ang ka vai e Parte,
Min hnemtu reng reng ka tawng silo…’

ti a lunglen thu mai lo zawng chham chhuah tur a hre bik hlawl silo ang hian, ar ang vaih ve mai pawh a awl hialin ka ring.

He hun mawi leh duhawm vangpui kawl a lo her liam leh mai thin hi miti’n te hian kan ui in kan ngai vawng vawng thin.

Post a Comment

Powered by Blogger.