– Pc.Lalruatpuia
Kan Bible chuan Genesis-ah khan atirah Lei leh Van asiam thu a sawi a, thu maiin (lo awm rawh se tih ringawtin) he leia thil siam dang zawng zawng hi adin a nih kha, chung a thilsiam zawng zawng enkawl tur leh an chhunga thuneihna sang tak nei turin Ama kut ngeiin mihring asiam a nih kha. Chutak chu alawm hmangaihna hmasa ber chu. Chu mai ani lo Lal Isua ngei pawh khan nang leh kei hi hmangaihna avang bawkin a ni min rawn zawn chhuah leh tak ni. Fak hla siamtu pawhin, ‘Van khawpuiten ui mahse an dang zo love’ alo ti hial reng a nih kha.
Kan hman liam mek february ni 14 khawvelin, ‘Valentines Day’ tia kan lawm hut hut, helai Mizoram theng thlengin,khawpui leh thingtlang ah pawh adang chuanglo. Thalai inngaizawngte chuan he ni hi kan thiam ang tawk leh kan tlin ang tawkin kan hmangaihte nena inserh hran nan kan hmang a, hmangaihte tana inpekna ni ropui a ni. Chu hmangaihna avang chuan alawm mahni inseng so in ‘Thilpek’ inpek ni atan kan hlawm reng ni.
Hmangaih thilpek kha a dawngtu tan chuan ava lawmawm dawn em. kan ngaihzawngte leh kan Nupui/Pasal ka (mouth) atanga thu ngaihthlak nuam ber chu ‘Ka Hmangaih Che’ tih hi ani mai lo’ng maw? Hmangaihna a awm avang hian alawm mi hrang daih tun hmaa hriat pawh la in hre ngai reng renglo kha kan han inngaizawng ta tlat a, chu hmangaihna avang bawk chuan ‘Nupa’ ah kan insiam thin anih hlawm hi. Hmangaihna aia thu thiltithei hi a awm dawn chuang em ni? Hei hi valentines day hmang tute tan phei chuan kan thu laimu tur a ni. He ni, February ni 14 hian engzah takin kan kawppuite hnenah kan hmangaih thu inhlan hlawm tak ang i maw?
Engati nge mizo nupa nun hi a romantic loh bik em em le tiin nangmah leh nangmah kha ilo inzawt thin em? Kan mizo nupa nun hi a romantic tlat lo,a chhan ber chu kan kawppuite te hnenah kan hmangaih thu kan hrilh hreh lutuk leh kan hrilh khat lutuk hi ani ber mai. I kawppui khan i hmangaih tih chu a hre teh meuh mai, chutiang anih avanga nang kha kawp che pawh ani reng e. Nupa leh inngaihnaah pawh inpawhna tak tak thlen tur chuan kan kawppuite hnenah kan hmangaih thu kan hrilh fo angai a ni. A chhan chu inngaizawngte leh nupa karah hian hmangaihna hi alo ‘Romantic’ ber tlat alawm.
Hmangaihna hi tunge sawifiah thiam tehlul le? Tirhkoh Paula meuh pawh khan a lehkhathawnah khan hmangaihna ber pawh hrilh fiah ta lo chuan,hmangaihna in a ken tel thil chi hrang hrang ‘Hmangaihna in a dawhthei a, ngil anei bawk thin’ tih ang chi hlir aziak ta zawk anih kha. Hmangaihna neilo mihring chuan ‘NUN’ tak tak a neilo te i han ti ngawt mai teh ang, a chhan chu mihring nun ti ropui ber tu chu ‘HMANGAIHNA’ hi ani tlat si alawm. He hmangaihna vek hian pa rorum, mittui a nei ve lo aniang tih tur khawpa pa tuarchhelte meuh pawh an mittui a ko chhuak thei zu nia!
Chu hmangaihna chu rilru inhlantawnna a awm chiahin alo famkim thin a, chu famkimna pawh rinawmnain a umzui phawt chuan inngaizawngte leh nupa karah pawh hmangaihna hi anih dan tur in alo parchhuak ang a, chutih hunah chuan nitin mai hi ‘Hmangaihna Ni’ Valentines Day chu alo ni reng tawh mai dawn zawk alo ni e.
Post a Comment