Aizawl: November 23, 2017 atanga Tuirial Airfield-a neih Winter festival chu nimin khan Tourism Minister John Rotluangliana chuan a khar.
Tourism Minister chuan thu sawiin Winter Festival hmasa ber hlawhtling taka hman a ni chu lawmawm a tih thu a sawi a. Anthurium leh Thalfavang Kut te hmang tawh lovin a aiah Winter Festival hman thin a nih tawh dawn tih a sawi a.
Winter Festival chu Mizote tan chauh ni lo ram hrang hrang atanga khualzinte hipna tur anih thu leh tu pawh tel theihna tura ruahman a nih thu a sawi. Thusawitu dang Tourism Secretary Sangdingliana IAS chuan Tourism hmalakna hrang hrang te tarlangin Thenzawl-ah golf course leh Chaltlang-Durtlang inkarah cable car siam hna thawh mek a nih thu leh Rural home-stay program kalpui chhoh mek a nih thu a sawi a. Sakawrhmuituai tlangah skywalk siam tum anih thu sawiin Mizoram chu khualzin mite tana tlawh chakawm tak a nih zel tur thu a sawi a ni.
Winter Festival hi Ministry of Tourism, DoNER leh NEC atanga sum hmuh hmangin Mizoram Tourism Department in an buatsaih a ni a. Winter Festival 2017-ah hian stall 35 siam niin food court, kids playground, carnival, rifle shooting, paintball, archery, aeromodelling, paragliding leh hot air balloon te a awm a. Mi 5000 chuangin Festival hi an chhim nia hriat a ni. -Zalen
Post a Comment