Mizo tlangval Jeje Lalpekhlua'n India tan goal a khung leh ta - AFC Asian Cup UAE 2019 qualifier khelh mekah India chuan Thawhlehni zan khan Myanmar an mikhual a, goal hnih ve ve khungin an inhnehtawk. India tan Mizo rawlthar Jerry Lalrinzuala chuan inkhel bul a ṭan bawk a, Chennaiyin FC tana Jeje-a nena khel mek Jerry hi a khel chhe hran lo. Season hmasa I League-a Aizawl FC Champion puitu Lalruatthara chu squad-ah awm mah se bench lamah a hun a hmang tluan thung.
Minute 69 thleng chu India hian 2-1 in si an phur a, Asian Cup khel tura tling chiang tawh Blue Tigers hi an mualpho dawn niin a lang hman. Mahse, Hnahthial tlangval India tan a inlar a, si phurh sutna goal Jeje-a'n a khung - Chennaiyin striker goal khung hi Eugeneson Lyngdoh-a siamsak a ni a, Khasi tlangval hian field lai aṭanga ball vawrh lutin Jeje chuan mawi zetin ball a la thla a, goal kil sirah a khung.
Mikhual team Myanmar hian minute khatna lekah Yan Naing hmangin goal hmahruai an khung a, India tan captain Sunil Chhetri chuan a sut - Bengaluru FC striker hian ama penalty hlawhchhuah chu minute 13-naah si phurh sut nan a hmang a ni.
Mahse, mikhual team Myanmar hian Kyaw Ko Ko hmangin goal an chhuah aṭanga minute ruk hnu lawkah an goal hnihna an khung chhunzawm a, India-in an mualpho hliahkhuh turin minute 69-naa Jeje-a goal an mamawh phah a ni. -Vanglaini
Post a Comment