 |
| Lalhungchhungi Pachuau |
Lalhungchhungi Pachuau hi kum 1957 December ni 7 khan, Saichal khuaah a piang a. A pa chu Lalbiakthanga Pachuau a ni a, a nu chu Ralzingi a ni. An unau hi 6 an ni a. A zai thiam bakah a hmel thatna leh a chetze zei avangin mite hriat a hlawhin a lar phah hle.
Kum 1988 September ni 16 khan Zisangzela Hnamte nen an innei a, an pa nen hian All India Radio Aizawl ah an thawk ve ve a, amah hian kum 1978 atangin Radio Announcer hna tun thleng hian a la thawk. An pahnihin zai lamah an inhmang dun a, a pasal erawh chuan kum 2002 khan a boral san ta a. Tunah hian a fate nen Tuikhuahtlangah an la cheng a ni.
Lalhungchhungi Pachuau hi kum 1974 a High School a kal lai atangin mipui hmuh leh hriatah a zai tan tawh a. Hmun hrang hrangah sawm kual a hlawh tan viau a.
 |
| An Nupa Thlalak |
Kum 1978 ah Radio (AIR) Aizawl Station-ah hla a record tan a. Hla 65 chuang zet a thun tawh a ni. A hla thunte hi Lengzem, Hla lenglawng leh Pathian hla te an ni hlawm.
Mi dang aia a danglam bikna riau chu, a hun leh hmun azira a hla sak azirin a boruak (mood) ah a cheng thiam em em mai hi a ni. Rilru leh thinlung taka a sak chuan mite ngaihtuahna a la thui viau thin. Tun thleng hian Radio-a a hla thunte pawh hi mite rilru hnehtu leh lungkuaitu a ni fo thin.
Kum 1981 khan a vawi khatna atan ama pualin Audio Album a siam a, Pi Pu Chhuahtlang Hlui tih hmangin a siam a, he hla zet hi chuan mite hriat a hlawh hle mai. Pu Liandala (L) phuah a ni a, a hla thu leh thluk a mawi a, pi pu chhuahtlang hlui min thlirtir a, a satuin a sa fuh bawk a, nunhlui ngai ngai lo pawhin he hla an ngaihthlak zet chuan lunglengin an kur phah fo thin a ni.
Kum 1990 ah Album dang, I hmangaih lo vem ni? tih hmangin a tichhuak leh a, Zan lungngaihthlak tih hla a dah tel bawk a, mite hriat a hlawh hle.
 |
| Sailothangi Sailo & Lalhungchhungi Pachuau |
A vawi thumna atan kum 1998 khan Nunhlui tahna tih hmangin a siam leh a, hei hian mi rilru a hipin, a hming a vuah fuh bawk a, nunhlui ngai lo fa awm thei lo hial khawpin he hla hian mite rilru a fan chhuak a. He Album-ah hian hla hlui, hranghlui lam duh chi a tam avang hian a hlu zual hle, chung zingah chuan, Nunlhlui tahna, La-i zun, Aw Vala, Di hlui, Ka nu, khawnge i awm? tih leh Huiva hram thiam tih te a ni a. Ka nu khawnge i awm tih hla ama phuah lungrun zet maia a han sa phei chuan mite rilru a hnehin, mi tam tak mittui a kaichhuak a, mite’n an hlut hle a ni. He hla hi kum 1981 kuma a phuah a ni.
Amah hi kohhran leh khawtlangah a inhmang hle a, Vantlang thiltih leh kohhran thuchhuak ngaipawimawh mi a ni a, mi zaidam, rilru tha tak pu mi, mi rilru tihnat hlau tak a ni. Mihring nun hi a hmu chiang thawkhat hle niin a lang. A nun a nemin kawm a nuam hle a, nu nih tling tak a ni.
Post a Comment