H. Vanlalhlana hi kum 1958, March ni 19 ah Saitual Chawnpui Vengah a piang a. A pa chu Saikhawnghinga (L) a ni a, a nu chu Chawimawii (L) a ni. An khuaah hian seilian chhovin, zirna lam pawh a bei chho a. Kum 1990 khan Aizawlah pem lutin, Chaltlang, Aizawlah tun thlengin a la awm. Hindi Teacher niin, Chanmari M/S ah a thawk mek. |
| C Sanga & Vanlalhlana |
Vanlalhlana hlate hi ngaihthlak a nuam hlawm hle a. Mi lungleng leh khawhar mi tan ngaihthlak a hlawk hle. Amah hi a lar ve hrim hrim bawk a. Kum 1989 khan Radio (AIR) ah hla a record a, mahse chuti takin a larpui lem lo. Aizawla Local Cable T.V. an han siam a, zaithiam larho an han zai chhoh khan ani pawh chuan hla pali - Nuam chem chem, German run zai, Nula zurui leh Vullai ni tih hla thun vein, a shooting atangin namen lovin a lar chho ta a. Chumi zawhah ‘Kal chhet chhet’ tih hlain a um zui a, chuta tang chuan ram pum hi a deng chhuak tak tak ta a ni.
Radio-ah hian hla 57 zet a thun tawh a. Nuam chem chem tih hla hi 1990-1992 chhung a lar hle a. German rrn zai hian 1990 atanga tun thleng hi a vanglai a la hawlh a. Hraite Kal chhet chhet tih phei chu hre lo an awm lo hial ang, 1991 atanga lar chho tan kha a ni. ‘A di a then em ni?’ tih hla phei chu a larin, mite’n an duh hle a, 1999 atanga tun thleng hian a la lar hle. Luah loh di hmeltha tih hla hi 2006 vel atangin a lar chho a, Laldanga awi awi zai hi 2006 atangin a lar chhoh pui a. Hetih lai bawk hian A rei ta e tih hla a lar hle bawk. 2007 Krismas vel atang khan Krismas hla, ‘Hlim takin i chawimawi ang u’ tih hla chu a larpui hle bawk.
Casstte (album) hetiang hi a siam tawh dan a ni:
1. Nuam chem chem - 1990
2. Hraite kal chhet chhet - 1991
3. Mizo Upa Zai - 1993
4. Hla lar thinte - 1994
5. Lenlai ni - 1998
6. Nang then chu - 2003
7. Lengkhawm leh khawhar hla - 2004
8. X-Mas leh Kumhlui - 2005
9. Mizo Upa Zai Vol-II - 2007
10. The Best of Vanlalhlana with Music Video-2008
Hla hi 9 lai a phuah tawh a, a hla phuah te:
1. He thlaler hmun (Devotional) - 1986
2. Belhchian dawl lo khawvel (Devotional)-1985 (AIR ah record tawh)
3. A rei lo em! (Devotional) - 1985 (AIR ah record)
4. Min han biak ang che (Lenglawng) - 1989(record tawh)
5. Piancham lawmna hla - 1989 (Record tawh)
6. Hlimte’n lam ang u (Lenglawng)
7. I leng za ang u (Lenglawng)
8. Nuam chem chem (1990)
9. Ka ngai em mai (Lengzem) - 1989
Post a Comment