- Upa L. Nunthara Saitual


Pu Dorawta Sailo, Darchhun khaw Lal chu kum1912 ah Kristianah a inpe a. Chutia  Kristian a lo nih takah chuan, Bawlhlo leh zurui awm lohna, Kristiante chauh awmna tur, ‘Khua’ din a duh ta a. Chu khaw thar hmun atan chuan, Saihmar khan, tuna (Saitual khua kan tih hi) a thlang fel ta a. He a khaw din thar tur hi a hlawhtlin ngei theihnan nasa takin a tawngtai a. “Kristiante awmna tur khua ka siam dawn a, a duh apiang lo kal rawh u” tiin lehkha a thawn darh a, khaw hrang hrang atangin an Lal ten an tih duh dah, Kristian chhungkaw 16 lai chu an lo pem khawm ta a.
                               
Biakin an sa a, tiduhdahtu awm lova an awm khawm chu an hlim hle a ni. Heng chhungkaw 16 te hi tawngtai chhanna duhawm leh hlu tak an ni a. Kristian khaw dinna a hmahruaitu leh sulsu tu te an ni.

Pu Dorawta chuan heng ho te hi kum khat chhung chu Darchhun atangin a awp a, 1916-ah  chuan a khaw mi engemaw zat nen a khaw tharah chuan an chho ve ta a. Biakin lian zawk an sa a, nitin sikul pawh an nei a, an changtlung tan ta hle a ni. Mahse, hetih hinlai hi British Sorkar insawngbawl lai a nih avangin, Kuli leh Puakphurh a tam em em a, Lal Dorawta leh a upa ten harsatna tam tak karah a khua leh tui te tan theihtawpin an bei a. An khua leh tui ten chhel tak leh thuawih takin tan an lo la bawk a. Pathian khawngaihnain Mizoram a khaw nuam leh pawimawh ber te zing a mi a lo ni ta a ni. Mahse, politic avanga kan ram a lo buai khan, a ti bahlah em em a, tun hma a tluk lo tute pawh khan an lehpel ta.

Tunah hian S.D.O (C) thuthmun niin, hma a sawn ve leh ta mek a, zirna lamah pawh Govt. College hial a lo awm ta a, P.W.D Div. leh Sorkar Dept. hrang hrang pawh engemaw zat a lo awm ve ta zel a. Pathian hian Amah ringtute awmna tura a din hi a theihnghilh lo a, a la chawisang zel ngei ang.
  
Ziaktu chanchin tawi :

He thu ziaktu Upa L. Nunthara hi, Saitual khaw Lal Dorawta fapa naupangber a ni a, Tunah hian Chhimveng leh Venglai inrina Bazar pui bulah a tu leh fate nen an cheng mek a ni. He blog hi buatsaih a nih lai atangin kawng hrang hrangah min pui nasa em em a, a chungah kanlawm hle a ni. Hun remchang hmasa berah Saitual khaw din tirh lai vel leh tunhma hun lam a an thlalak hlui kan hmuh theih ang ang tam tak rawn upload tum a ni a, tunah hian buaipui mek a ni. 


Location: 

Saitual khua hi Aizawl District hnuaia awm thin niin kum 2008 khan Mizoram sawrkar chuan District Headquarters ah a puanga. Tunah hian District Headquarters nihna tura implementation tih hmuhtur erawh a la awm lemlo.

Aizawl atanga chhak lampang 75 Kms a hla a ni a, Champhai Road a kalin Keifangah a penga. A khawhmun hi hmun nuamtak niin Mizorama khaw lar berte zinga mi a ni awm e.

Kum 2001 chhiarpuiah khan mihring 10,243 an awm a. Mipa leh hmeichhia hi an inzat chiah a ni. Ziak leh chhiar thiam 83% an awm a. Mipa ziak leh chhiar thiam zawng zawng hi 84 % niin hmeichhia 82% in ziak leh chhiar an thiam a ni. Mihring awm zawng zawng atanga 14% hi naupang kum 6 hnuai lam an ni.

A awmna lai tak Geographical coordinates hi 23.689630°N 92.955670°E a ni.

Post a Comment

Powered by Blogger.