- Luaia Hrahsel
Thupuana bung hlu tak (19-na) kan lo zir zo leh dawn ta a. Bung 19-naah hi khawvel siam tirh atanga hun tawp thlenga lalram pahnih inep rengte dinhmun chin felna a ni a.Hetah hian Kohhran chu Krista mo, setana leh a lalram tukzal tura ropui taka khawvela a lo kir leh huna a rawn hruai tur angin sawi a ni.
Thuthlung Thara 'Halleluia' tih lanna awm chhun a ni bawk. Vawiinah hian sakawlh leh a sangawi zawnpuite hneh leh hrem an nih thu kan zir dawn a ni.
1. Sakawr var leh a chunga chuang (11-16) : Johana chuan van inhawng a hmu a, a vawi hnih hmuhna a ni (Thup 4:1). Van khawpui luhna kawngka (entrance) hi an khar ngai lo va (Thup 21:25), a chhuahna lam (exit) erawh chu chhan bik neia hawn ni ngeiin a lang (Mk 1:10, Tirh 7:56; 10:11).
Tun tuma Johanan a hmuh pawh hi khawvel rorelsak tura lo kal Isua tana hawn a ni. Isua chu sakawr var chungah a chuang a. Sakawr hian indona a entir a, a var hian hnehna a entir. Rom khawpui kawtthlera hnehna kawng zawh an neihin sipai hotu chu sakawr var chungah an chuantir thin.
Bung hmasa lamah sakawr var chunga chuang, Isua ni mai awma ngaih theih kan hmu tawh a (Thup 6:2). Tuna Johanan a hmuh hi Isua ngei a ni tih ringtuten an hriat theih nan finfiahna thu tam tak a sawi a ni.
Rinawm-leh Diktaka tih hi Isua ngeiin Laodikei Kohhranho hnena a inpuanna hming a ni a (Thup 3:14). Hei hian Isua chu Pa hmaa min sawipuitu tur thuhretu rinawm, dik taka mi tin rorelsaktu a ni tih min hriattir a. Leia lalten duhamna leh ropui duhna avangin indona an chawk chhuak thin a, ani erawh chuan rorelna dik tung ding tura indona thianghlim a puang a ni.
A mit chu mei alh ang a ni tih hi a thiltihtheihzia, engkim a hmu tlangtu, tithianghlimtu leh dotute kang raltu a nihna entirtu a ni (Thup 1:14; 2:18; 3:18; 8:5).
'Lallukhum tam tak a khum' tih hi hrilhfiah deuh ngai a ni a. Lallukhum sawina hi grik tawngin chi hnih, stephanos leh diadema a awm a. Stephanos hi hlawh chhuah lallukhum (crown of achievement) a ni a, diadema chu nihnain a ken, lal leh thuneituten an khum thin (crown of royalty) a ni.
Lal Isuan a khum hi diadema zawk hi a ni a. A lalna leh ropuina chu hlawh chhuah ni lovin, Pa atanga a rochun a ni. Khawvelin a hmuh hnuhnun ber khan hling lukhum a khum a, lallukhum ropui ber khumin a hmu leh dawn a ni. Hming ziak, tuma chhiar ve theih loh hi ringtute hnena a pek tur hming thar a sawi kha a ni thei ang (Thup 2:17;3:12).
Heng zawng zawng atang hian sakawr var chunga chuang hi an la hre fiah lo a nih pawhin, "puan thisen kai a sin" tih atang hi chuan ringtu tawh phawt chuan Isua a ni tih an hre fiah tawh ang (Isa 63:1-3).
'Pathian Thua' tih hi Lal Isua nihna a ni a. Johanan Isua chu 'Thu' atanga a intan dan sawiin, "Thu chu tisaah a lo chang a, kan zingah a awm ta a (Pa fa mal neih ropui angin a ropuizia kan hmu)" tiin a sawi zui a ni (Jn 1:1-14).
Pathian thu tih hi Thupuanah vawi nga lai kan hmu a (1:2, 9; 6:9; 19:13; 20:4), 'Pathian inpuan chhuahna' tihna a ni.
Isua lo kal hi van sipaihoten puan zai sin var tak, fai tak sinin, sakawr var chunga chuangin an rawn zui a. Gethsemani huana Isuan, "Tunah pawh vantirhkoh sangruk hmun sawm leh hmun hnih aia tam zawk mi rawn tirhsak turin ka Pa hnenah ngen thei lovin mi ring em ni le?" tia a sawi chu a takin a lo thleng ta a ni.
Heng sipaite hi vantirhkohte nge ringtu, chatuan chawlhnaa lut tawhte? Vantirhkohte ni ngeia ngaih theih a ni a (Zak 14:5; Mt 16:27; 1Thes 3:13). Chutih rualin an puante Beramno thisena sua intifai ringtute pawh an ni thei bawk bawk.
Puan var tak, fai tak an sin hian khawvel sualin a khawih phak loh, chatuan famkimna chang tawhte an ni tih a tilang a. Indo tura kal e ti lovin ralthuam an keng lova, an mamawh hek lo. An zui sipaihote Lalpa, 'Lalte Lal leh Hotute Hotu' ka atanga lo chhuak khandaih hriam tak chuan hmelmate a tudai vek dawn a ni (Thup 2:16). Khandaih hi Pathian thu nen tehkhin a ni (Thup 1:16; 2:12; Heb 4:12).
'Thirtiangin an ro a rel ang' tih hian a hmaa hmeichhe hrinin rorelna a ken kawh dan tur a sawi kha a thleng dik mek tih a lantir (Thup 12:5).
Pathian Engkimtitheia thinur nasatna grep sawr khur pawh hi zirlai hmasa lama kan sawi tawh ang khan, mi sualte chanvo rapthlak turzia sawina a ni (Isa 63:1-3; Thup 14:19).
2. Ruai ropui theh tura sawmna (17-18) : Bible-ah ruai chi li, Chhandamna ruai ropui (Lk 14:16-24), Lalpa Zanriah/Zanriah hnuhnung (Mt 26:26-30; Mk14:22-26; Lk 22:14-20), Beramno nupui neihna ruai (Thup 19:6-10) leh Pathian ruai ropui (Thup 19:18) te kan hmu a.
Tuna kan sawi mek ruai ropui hi a palina 'Pathian ruai ropui' a ni. He ruai ropuiah hian mi/thil pali an inrawlh a. A hmasa berah chuan ruai neitu Pathian a ni. He huna thih pukna lo thleng tur hi leilung chhiatnain a thlen emaw vanduaina avanga lo awm tur emaw ni lovin, Pathian thu, ama rel leh kut liau liau a ni.
Pahnihna chu ruai theh tura sawmtu, nia ding vantirhkoh a ni. 'Nia ding' tih hi a ngial a ngana lak tur ni lovin, Pathian thupek puang turin vantirhkoh hi a langsar thei ang berin, khawvel chung tlak ranin ni engah a ding a ni ngei ang.
Pathumna chu ruai theh tura sawm vanlaizawla sava thlawk zawng zawngte an ni. Khawvela sava zawng zawngte ei khawp mitthi ruang a awm dawn avangin vantirhkoh hian aw ring takin, duhthawh takin a sawm a ni.
Palina chu ruaia hman tur mihring ruang a ni. Mi te leh mi lian, hausa leh rethei thliar lovin, hmun tin mai chu ruangin a khat ang a, lal, mi hausa leh rethei sa chu chungleng savate tan ruai a ni dawn a ni.
He ruai ropui hian Bible-ah anpui dang a nei vak lova ngai an awm a. Amaherawh chu Isuan, “Khawiah pawh saruang awmna apiangah mulukawlhte pawh an awm khawm ang" tia a sawi (Mt 2:28) leh Ezekielan Gog leh Magog tlawm tur thu a sawi chhunzawm zelna, "Tin, nang, mihring fapa, LALPA PATHIAN chuan heti hian a ti a ni: sava chi tinrengte leh sa tinrengte hnênah tu sawi la,'Pung khâwm ula, lo kal rawh u, sa in eia thisen in in theih nân Israel tlânga in thawina ropui tak, in tana ka siam vêlah chuan rawn in khawm rawh u. Miropui sate in ei ang a, leia hotute thisen in in ang a, berâmpate, berâmnote, kêlte, Basan rama bâwngpa châwm thau zawng zawngte thisente nên. In tana inthawina ruai ka theh thau chu puar teuhvin in ei ang a, a thisen chu rui khawpin in in ang. Tichuan, sakawrte, tawlailir hnuk mite, mi ropuite leh ral tu mi zawngtein ka chawhluiah in tlai ang" tia a sawi hi he thil lo thleng tur sawi lawkna niin a lang (Eze 39:17-20).
3. Indona leh Isua Krista hnehna (9) : Hei hi 'Har Mageddon indona' tia an sawi thin chu a ni. Berhbu parukna Euphrates luia leih buak a nih khan dragon, sakawlh leh zawlnei der ka atanga lo chhuak chungu ang thlarau bawlhhlawh pathumte chu Pathian Engkimtitheia ni ropuia indonaa hruai khawm turin khawvel zawng zawnga lalte hnenah kalin hmun pakhat, Hebrai tawnga Har-magedon an tiha an hruai khawm thu kan hmu a (Thup 16:13-16).
Hei hi tuna Lal Isua leh van sipaite lo do tura sakawlh te, leia lalho te, an sipaihote inpun khawm chiam hi a ni ang. Heta 'sakawlh' tih hi hrilhfiahtute zingah dragon rulpui tar, setana/diabola nia ngai an awm a.
Amaherawhchu dragon hi hemi hnuah hian kum sangkhat chhung atan phuar tur a la nih avangin, he sakawlh hi tuifinriat atanga lo chhuak, Krista dodaltu (anti-Christ) kha a ni.
Zawlnei der hi chu lei atanga lo chhuak, sakawlh tana tangkai tak, a chhinchhiahna an neih theihna tur leh a lem chibai an buk theihna tura chhinchhiahna leh thilmak hmanga mite bum thintu kha a ni.
Indona ropui tak hmachhawn tura sakawlh leh zawelnei derte huaihawtna hnuaia khawvel lalte leh an sipai rualte inpun khawm chu an tam hle ang tih a rin theih a.
Tawtawrawt parukna ham a nih khan chumi darkar leh ni leh thla leh kum atan chuan, mihring hmun thuma thena hmun khat tihlum tura buatsaih tawh vantirhkoh palite phelh an nih thu leh sipai sakawr chung chuang tam lam chu 20,00,00,000 lai a nih thu kan hmu a ni.
An inpun khawm ve nasat tehlul nen indo hma hauhvin an khaipa pahnih, sakawlh leh zawlnei derte chu an man a, taksa thihna rorelna hnuhnung pawh nghak lovin a nung chungin kata kang meidilah an paih ta a ni. An sipai rualte erawh chu Isua ka atanga lo chhuak khaidaiha sah hlum vek an ni a, sava zawng zawng chu an sate eiin an puar ta vek a ni.
Tlangkawmna : A lalram ni tura Pathianin a siam, a fapa neih chhun Isua thisena a lei khawvel chu nasa takin setanan a chuhpui a. Hnehtu ang maia a lan hial chang awm mahse, khawvel hnehna atana a thisenin a bual, a puan thisen kai sina a lo kal leh meuh chuan setana tan chelh rual a ni lo a ni.
Lal Isua leh a sipai rualte ep tura inpun khawm sakawlh lam tangte chu Isua ka atanga chhuak thu ringawt chuan a tudawl der mai a ni.
Post a Comment