Save Chite Lui Coordination Committee (SCLCC) leh Mizoram State NSS Office huaihawtin nimin khan Chite lui thenfai hnatlangpui thawh hnihna neih a ni a, Aizawla higher secondary school 12 aṭangin NSS volunteer 400 thawk chhuakin, Chite luia bawlhhlawhte an thianfai.

Hnatlangte hi hmun hnihah an inṭhen a; Bethlehem Vengthlang kai aṭanga hnatlang turte chu chief secretary Lalmalsawma, SCLCC chairman ni bawkin a vai liam. Chief Secretary chuan, Chite lui chhanchhuah leh humhalh hna chu mi tin mawhphurhna a nih thu sawiin, Mizo mipuiin ṭangruala an beih phawt chuan Chite lui chu lui thianghlim leh chhenfakawm a ni leh ngei a beisei thu a sawi.

Chite Veng kai aṭanga hnatlang turte chu Central YMA president Vanlalruata, SCLCC vice chairman ni bawkin a vai liam a; Vanlalruata chuan, Mizorama lui leh tuihna humhalh chu YMA member zawng zawng mawhphurhna a nih thu sawiin, "YMA member-te chu tichhetu leh tikhawlotu ni loin, humhalhtu leh siamṭhatu kan ni zel zawk tur a ni," a ti.

Nimina Chite lui thenfai hnatlangah hian Aizawla HSS 12 - Central HSS, Chaltlang HSS, JL HSS, KM HSS, Durtlang HSS, Mizo HSS, Republic HSS, Helen Lowry HSS, Synod HSS, Mamawii HSS, Public HSS leh Zemabawk HSS-a NSS unit-te an thawk chhuak a ni. -Vanglaini

Post a Comment

Powered by Blogger.