-- Tv. Lalthakima
Chawlawlnain min tuam a, Pathian hnaih lote tanah han hnaih dan kawng reng reng a awm dawn tawh lo emaw tih laiin leh, thenkhatin, "Khawngaihna hun a tawp tawh" tia mahni rilru tiah lek leka Pathian thu an au chhuahpui mek laiin kan Pathian khawngaihna chu Zoramah meipui angin; kan ngaihtuah dan piah lam daihin a rawn alh leh ta hluah hluah mai le! A lawmawmin a va ropui em.
'Ngaiteh u, Pathianin he khawvel thila retheite hi rinnaa hausa tur leh, amah hmangaihtute hnena a tiam ram chu luahtu turahte a ruat lo vem ni' tih ziak ve bawk mahse; tun tum harhna hi chuan 'a hausa sa a hrut' emaw tih mai turin a ngaihlutu tam zawk nia langte hi dinhmun sang tak taka dingte an ni tlat mai! Zoram pum huap pawha 'veng hausa ber' tia han chhal ngam tur Zarkawt Kohhrana Revival Retreat neih zawh takahte khan: an Usher-te nen lam khan an lam dawr dawr mai a, taksa chetnain nasa taka a han nuaite kha a ropui tak zet zet a ni.
Kan Kohhran atanga Pastor chhuak, Zoram pum huap ang pawha kan ngaihsan em em Rev. C. Chanchinmawia'n, "Tun harhna lo thleng hi a changtute hian an chan hrilh fiahsak an duh kher lo, hrilh fiah lo tum pawh a tul lo, kan chan theuh tur a ni," a tih kha a dik khawp mai. Rawngbawltu tam tak chuan an zir thiamna atangin sawi fiah an tum a, an hmu dik thei lo; an zir dan piah lamin a rawn thleng tawh si. Lal Isua'n 'Buh seng thlengin lo to za rawh se' a tih ang deuhvin he harhna lo thleng mek pawh hi kan ril rem a ni emaw, ni lo emaw tha takin lo dawngsawng ila, a that ber a rinawm.
Pathian khawngaihna a zarah kan kohhran pawhin he Pathian khawngaihna lo thleng mek hi kan chang a ni a, a lawmawm tak meuh meuh a ni. Engti anga dawnsawn zel tur nge ni ang? A pawimawh nia hriatte i han sawi dawn teh ang.
(i) Rawngbawltute tan: Kan hruai hnaih hleihtheih loh Kohhran member, |halai member, Kohhran hmeichhe member, Pavalai member tam tak an lo hnai ta a. Pathian thu taka lo chawm zui tur leh chher puitling deuh deuh turin kan inbuatsaih a pawimawh hle niin a lang. 'Rei an daih leh tak tak chuang lo vang' tia lo ralkhat thlir mai lovin; daih rei leh lo tur anga kan hmuhte hian rei tak an daih theihna turin theihtawp kan chhuah a, inngaihtlawmna nen Pathian hnenah hruai dan tur kawng kan dil/ zawh a pawimawh hle ang.
(ii) Inlungrualna: II Korinth 13:11-ah, "A tawp berah chuan unaute u, lawm takin awm rawh u. Tihthat famkimin awm ula; thlamuang takin awm ula; rilru hmun khat pu ula, lungrual takin awm rawh u; tichuan hmangaihna leh remna Pathian chu in hnenah a awm dawn zuk nia," tih kan hmu a.
Kan kohhranah Thlarau Thianghlim pawlna nasa tak a lo thlen zel theih nan rilru hmun khat kan put a, kan inlungrual a pawimawh hle. Danglam deuh leh dik lo deuh nia langte haw mai lovin leh en hrang mai lovin fuih zawk ila, insiam that mamawhte'n insiam that hreh lo bawk ila. 'A leia mi rel ngai lova' tih angin thu tenau leh sep septe hi tihbo tum tlang ila. Chu'ng chuan kan Kohhran boruak alh zel turah tangkaina tam tak a nei ngei ang. Tin, 'san leh lansarhnate kan chan hian kan Lalpa ram a zauh phah miah lo' a ni tih hriain Sam ziaktu'n, "Lalpa keini ni lovin, keimahni ni lovin I hming chuah chu ropuina pe zawk ang che," a lo ti ngawih ngawih ang khan, kan tih apiang Pathian ropuina turin ti ila, Lalpa ropuina tur chauh zawng ila. Lalpa ropuia a lan hunah ropuiin kan lang ve mai dawn a ni.
(iii) Kan kohhran zai a'n sak deuh tum te, lam an han tlem deuh tumte hian 'Enge a chhan ni ang le; tihsual kan nei palh emawni le' tia rilru lo seng thinte hi engzat tak awm ang imaw. Nge, engtin paw'n kan Kohhran hi awm se, kan en liam mai mai thin zawk le... Kohhran chauhnaahte hian chau pha ve ila, a natnaahte hian i na ve pha ang u.
(iv) Tin, harhna chang zawng zawngte'n ni tina Pathian duhzawng kan tih zel a pawimawh hle. Phurna inhruaitir mai lovin Lalpa duhzawng kan zawn a pawimawh a, chutah chuan hlimna leh hamthatna dik tak a awm a ni. Phurna awm lohna hmunah Lalpa duhzawng kan ngaih pawimawh a, a thuawihna kawng kan ngaihven tlat chuan a nawlpui phurna leh a nawlpui anga kan hlim hup hup loh hunah pawh lawmna ruk kan nei reng dawn a ni. Hlim em em lawm si lote hi a chhan ber chu Pathian duhzawng tihna kawngah an tlan taihmak tawk loh vang a ni a, inkhawm peih viau thatnaa parchhuahpui tham khawp lawmna an thinlung lam fantu nei si lote pawh hi chutih vang tho chu a ni tlangpui thin.
v) A tawp berah chuan phurnaah innghat lovin 'Lalpa duhzawng enge ni' tih thu-ah hian i innghat reng ang u. Kan phur leh phur loh lam chu thu dang ni se, 'Lalpa duhzawngin ka awm/nung em' tihah hian kan rilru awm reng rawh se.
Post a Comment