Baptist Church of Mizoram (BCM)Baptist Church of Mizoram (BCM) general secretary Rev. F Ramdinmawia chuan, an kohhrante chu Krismas leh kum thar lawmna ruai ṭheh nana disposable thlêng, no leh thil dangte hmang tam lo turin a ngen.

BCM General Secretary chuan, Biodiversity and Nature Conservation Network (BIOCONE) ngenna angin, disposable no leh thlengte chu ṭawih ral thei lo chi a ni a, mihring leh ran, ramsa leh luia nungchate tan natna thlen thei a nih thu avangin mihring leh nungchate tan harsatna leh natna thlen theih a nih thu a tarlang a; a theih chin chinah hmang tam lo turin an kohhrante a ngen a ni.

Green Mizoram Network (GMN) pawhin thuchhuah siam­in, Krismas leh kum thar lawmna ruai ṭheh turte chu ruai ṭhehna atan ṭawih thei lo, disposable item hrang hrang hman danah fimkhur tur leh, ṭawih thei lo hmang lo thei ang bera rua­hmanna siam turin an ngen.

GMN chuan, hunpui thleng turah boruak tibawlhhlawh thei puak thei thil leh a kaihhnawih laka inthiar fihlîm tur leh environment tichhe lo thei ang bera hun hmang turin mi tin an ngen a; ṭawih thei lote chu ruai ṭheh nan an hmang lo thei lo a nih pawhin, hman hnu thehthang danah fimkhur tur leh uluk turin kohhran hrang hrangte an ngên a ni.

GMN chuan, "Ruai ṭhehnaah disposable thlêng, no leh thil dangte kan hmang nasa ta hle a. Disposable item kan hman nasatte hi ṭawih ral ve thei lo chi (non-biodegradable) a nih avang­in mihring, ran, ramsa leh luia nungchate tan natna hrang hrang a thlen thei a. A ṭawih ral ve mai theih loh avangin lei a tinghet lo a, leimin a siam duh em em a, disposable thlêng leh no siamna Styrofoam hian cancer-a thlen thei nia sawi a nih avangin ram ṭhenkhat chuan an khap hial tawh a ni," an ti.

Post a Comment

Powered by Blogger.