Vawiin hian Pu Lalnunzira In Lengte khuaah Mamit East Block huaihawtin mithar lawmluhna hun hman a ni. He hun hi Dr R Lalthangliana, Vice President, MNF-in a hmanpui a, Lengte ZNP Unit President Pu K Lalduhkima hovin ZNP Unit pumpui leh Congress ațangin voters 41 MNF-ah a lawmlut a, tlai lamah mithar lawmluhna ruai kilho a ni.

Dr R Lalthangliana chuan, "Congress sorkar hian thil țha leh ropui, inthlan leha tlin lehna tur thil liantham tih an nei lova, tih mek an nei hek lo. Chuvangin, nakum inthlanah hian Congress hi an tla dawn tih a chiang a, MNF-in sorkarna kan chang ngeiin ka ring a ni," a ti.

Dr Thangtea chuan, "MNF kan sorkar chuan thuneihna semzai, Decentralisation of Powers & Function chu nasa takin ngaih pawimawh a ni dawn a. Tun Congress sorkarah hian thingtlang mite'n ngaihsak an hlawh tawk lova, keini chuan SEDP hmangin thingtlang kil ber thlengin hmasawnna dik leh țha tak kan thlen dawn a ni," a ti.

MNF Vice President chuan MNF sorkar kum 10 chhung khan tihsual leh tihfuh tawk loh engemawzat a nei tih a sawi a, "Zoram mipui duh khawp kan tlin lohna leh an rilru kan tihnatnaah thinlung takin ngaihdam ka dil a. Pathian leh mipui zarah kan sorkar leh ngeiin ka ring a, Pu Zoramthanga hovin Zoramthar kan din dawn a ni," a ti.

Dr Thangtea chuan, "MNF chuan sorkarna a siam hunah SEDP hmangin chhungtin eizawnna nghet an neihna tur kan duang dawn a. Tuna Congress-in tlemte tea kum 3 vela sum a sem ang hian kan ti ve dawn lo a. Kuthnathawktute'n an dinchhuahpui ngei tur ruahmanna kan siam tawh a, SEDP pawh budget-ah dahin, hmun dang ațanga sum hmuhna tur pawh kan hre sa a ni," a ti bawk.

He hun hi J Lalrozika, Treasurer Mamit East Block-in a kaihruai a ni.

(THANGKIMA)
Joint Secretary
Media & Publicity Deptt
Mizo National Front
Memo No.MNF/Media/2017/147
Dt.2th December 2017.

Post a Comment

Powered by Blogger.