Vanneihthanga Vanchhawng

SYNOD KHAWMPUI VAWI 94-NA A TIAK TA
11th December, 2017 (MSR) : Mizorama Kohhran lian ber Mizoram Presbytyerian Kohhran rorelna sang Mizoram Synod Inkhawmpui vawi 94-na chu nizan khan a tiak a, Synod khawmpui hian budget cheng vbc 270 an pawm a, secular college din an rawt bawk.
Presbyterian Church of India, Mizoram Synod Inkhawmpui hi Bungkawn Kohhran Biak Inah thawhlehni atang khan neih tan a ni a. Kumin Synod Inkhawmpui thlarau lam thupui hi ‘Kohhran – Pathian Chhungkua’ a ni a, nizan khan 2017 Chaltlang bialtu Rev. Lalbiaknia’n thlarau lam thupui hmang hian Pathian Thuchah a sawi. Kumin 2017 Synod Inkhawmpuia Synod Puipate chu - Moderator Rev. F. Lalrinnunga, Secretary te chu Rev. Lianhmingthanga Sailo (Sr.), Upa R. Dengzikpuia (Jr.) te an ni a. Finance Officer te chu Rev. P.C. Pachhunga leh Rev. H. Remthanga an ni a, Statistician-ah Upa Dr. H. Vanlalhluna leh Executive Secretary-ah Rev. Lalramliana Pachuau leh Rev. B. Sangthanga te an ni.
Tun tum Synod hian kumkthar budget atan cheng vbc 270 a pawm a, Rs.vbc 270 atang hian Synod hnuaia thawktute hlawh tfur vbc 141.27 niin hei hi a hklawma sum hman chhuanna tur lian ber a ni a, Prebyterian School te enkawl nan Rs, vbc 3, zirlaite scholarship leh stupend ah Rs, vbc 2.89, harsate tanpuina tur vbc 17.90 te a tel a ni.
Synod Inkhawmpui chuan hun puma kohhran rawngbawltute zuk leh hmuam laka an fihlim theih nan hmalak ni rawh se tiin SEC bawhzui tura dah a ni a. Secular College din nise a ti a, Bawngkawna Hindi Bible School awm mek chu hmun dangah sawn chhuah rawt a niin a sawnna hmun atana MDTC Bualpui Compound en turta tih a ni a. Manipur a Mizoram Synod hmunte kohhran pakhatin Manipur sorkar hnuaia neitu nihna alo tihfel avangin PCI ah thlen nise an ti a. Durtlang Synod Hospital a nursing college hawn rawtna chu kum 2020 ah nursing school zawng zawng college anga kalpui tur anih avangin hospital board hmalakna inhruilhfiah a ni . Synod hnuaia thawktute hlawh siamtu tur pay commission din rawtna pawm a ni. Champhai Grape Growers Society-in grape wine an siam chhuah chu sacrament a wine atan hman ni rawh se tia rawtna lo lut erawh chu sawiho a nih hnu-ah a ngai anga kal ni se tia thu tihtluk a ni.
Nimin Pathianni chawhma inkhawmah Pastor 25 nemngheh leh Pro Pastor 16 dah ngheh inkhawm a awm a. Chawhnu lamah Lalpa Zanriah Sacrament inkhawm neih a ni a, Synod Moderator Rev. F. Lalrinnunga’n a theh a ni. Nizan inkhawmah Moderator kal chhuak Rev. Lalzuithanga’n Valedictory Sermon a sawi ani.
Nakum Synod inkhawmpui hi Electric Veng Bialin Electric Veng Kohhran Biak In-ah an thleng ang a, kum 2019-ah Mission Veng Bialin Mission Veng Kohhran Biak In-ah an thleng leh ang a, kum 2020-ah Dawrpui Bialin Dawrpui Kohhran Biak In-ah an thleng ang. Kum 2021 Synod Inkhawmpui chu Republic Veng Kohhran Biak Inah, Republic Veng Bialin an thleng thung ang.
Nakum Synod inkhawmpui a 2018-a Pastoral Ministry thupui atan “Pathian leh Kohhran tana rinawm” tih chu thlan a ni. Kum 2018 Synod Inkhawmpuia Puipa turte chu - Moderator : Rev. R. Lalhmingthanga, Mission Veng, Secretary te Upa R. Dengzikpuia, (Sr.), Maubawk leh Rev. R. Vanlalnghaka (Jr.), Synod Rescue Home te an ni a. Finance Officer te chu Rev. P.C. Pachhunga leh Rev. H. Remthanga, Mission Veng te niin Statistician chuRev. R. Lalnuntluanga, Chawnpui, a ni ang a. Executive Secretary te chu Rev. Lalramliana Pachuau leh Rev. B. Sangthanga te an ni ang.
Mizoram Synod hnuaiah hian Presbytery 49, Pastor Bial 288, Kohhran 1097, Member 5,94,457, Dan zawhkim 4,13,209, Kohhran pawl dang atanga Presbyterian a pakai 4100, Pawl danga pakai 2173, naupiaang 8,675, mitthi 3,660 a ni a. Synod hnuaiah hian thawktu Pastoral hnuaiah 934, SMB hnuaiah 2663, an vaiin 3597 an awm a. Mission Foeld 17 awmin ringthar 7,084 an awm a ni. Mizoram Synod atang hian April ni 2, 2017 khan Tripura Mission Field chu PCI General Assembly in Provisional Synod-ah a hlangkai a, Tripura Synod huam chhungah hian member 21,288 an awm a, hei vang hian synod inchhiarnaah kiamna hrang hrang a awm a ni. Manipur Presbyterian Singlup Provisional Synod chu April 23, 2017 khan Synod puitlingah hlankai a ni bawk.

Post a Comment

Powered by Blogger.