ct lalrinawmaDecember 9, 2017(MSR): Nimin Muslim Friday Prayer hunah Arabs-Muslim World chuan US President Donald Trump-an Jerusalem khawpui, Israel ram khawpui ber (capital) atan a puansakna chu khawvel hmun hrang hrangah duhlohna an entir nasa hle. Gaza Strip ah Hamas pawl leh Palestinian hoten “Day of Rage” neia kawng an zawh chu Israeli jet fighter-in rocket in an kap a, mi 13 hliamin mi 2 an kaphlum. West Bank a Old City ah pawh kawng zawhtu 3,000 chuang zingah Israeli security force te nen intihbuaina vangin hliam an awm nual bawk.

West Bank lama kawng zawhtute chuan”Jerusalem chu kan ta”, “Thu awmze neilo kan duh lo”, “Lung tum leh AK-47 rifles kan duh”, “America hi Rul lu chu a ni” tih thuziakte an keng a, al-Aqsa mosque ah mi 25,000 tawngtai awmin, he mosque atangin kawng an zawh tan a ni.
Hebron, Bethlehem leh Nablus khawpuiah te pawh Palestinian leh Israeli Security Force (IDF) te hi an inbei nasa a, lung tuma vawm chu IDF chuan “tear gas” leh “rubber bullet” hmangin an chhanglet bawk.
Israel military te chuan Palestinian hoten Zionist-Israel dodalna (intifada) an kal pui mekah rocket leh tyre te halin, Israeli sipai venghimtute an bei a ni, an ti. Israel sipaite chuan Hamas pawl ralthuam dahna an kap darh niin an sawi.
Hamas hotupa Fathi Hammas chuan, mipui pungkhawm hmaah, “Jerusalem khawpuia Embassy rawn sawn chu kan hmelma an ni ang. Jerusalem leh Palestine chu tih zalen (liberate) anih hma loh chuan, kan thisen far tawp thlengin kan bei anga; helna (intifada) kan kal pui dawn a ni” a ti.
Cairo, Egypt hmuna al-Azher Mosque kawtah chuan Muslim tawngtai ho chuan Palestinian hnam puanzar kengin an vai suau suau va; “Kan thlarau leh thisen nen Jerusalem chu a inzawm tlat a, phuba kan la ngei ang. Oh Palestine” tih thuziak te an keng bawk.

Khawvel Chanchinthar

Kuala Lumpur, Malaysia leh Jakarta, Indonesia rama Friday Prayer meeting a tel te chuan kawng zawh nghalin, US Embassy beih an tum a, mahse, buaina lian tham a chhuak zui rih lo.
Kuala Lumpur ah hian kawng zawhtute hi 5,000 chuang an ni. Kawng zawhtute chuan US-in Muslim biangah an bensak a ni, tiin thuziak “Down USA President Trump” tihte, “Hands of Jerusalem” tih te, Donald Trump a lim lemah “I am Demon Trump” tihte an ziak a. Jakarta ah erawh “No to Trump” tihte kengin Palestinian an thlawpzia entirnan an flag an keng nasa hle.
Tunusian President Beji Caid Essebsi chuan an rama US Ambassador chu kohvin, engvangin nge Donald Trump-an Jerusalem khawpui chu Israel tan bika a puan tih a zawt a ni.
Yemen khawpui Sana-ah Shiite Houthis hotu Abbdul Malik al-Houthi chuan, Arab-Muslim hote chu tangrual a, US Embassy hual bet turin al-Masirah TV kal tlangin a fuih pawrh a ni.
UN Security Council aiawha Middle East remna palai Nikolay Mladenov chuan, “President Trump a thiltih chuan Middle East ah buaina nasa zawk hun lo kal turah ala siam phah dawn chauh a ni” a ti.
French Foreign Minister Jean-Yves Le Drian chuan Donald Trump thiltih sawiselin, “Middle East a remna palai tur zingah a intel ta lo a ni” a ti. France ram hi Palestinian Independent pek duhtu, UN Security Council member nghet a ni a, a meizang hlaptu pawimawh tak a ni.
Nikki Haley, US Ambassador to UN chuan French pa tawngkam chhangin, “Israel remtihna tel lovin, UN pawh thutlukna a siam ringawt tur a ni lo. Israel chungchang hi atthlak takin UN in inremna a siam tir tur a ni lo” a ti.
Dan Dannon, Israeli Ambassador to UN chuan, “President Trump hian huaisen takin PM David Ben Gurion angin thutlukna (bold decision) a siam a ni” tiin a fak hle. Israeli PM David Ben Gurion chuan kum 1949 Dec 5 khan, “Jerusalem hi Israel atanga lak hran theih a ni lo. Israelte chatuan khawpui (eternal capital) a ni. He thil hi UN pawh “historic fact” (hun kal tawhah pawh thudik tak) a nih hi a pha thei lovang” a lo ti tawh a ni. PM Gurion chuan UN-in Jerusalem chungchanga thutlukna a siam hma ni chiahin a sawi a ni. Mahse, UN meuhvin Jerusalem chu international status ah a dah tak avangin, tu ram mahin an Embassy chu Jerusalem ah an dah duhlova, diplomatic meeting reng reng Jerusalem ah an nei duh zui ta lo.
Hezbollah hel (Lebanon) hotupa Hassan Nasrallah chuan, “Trump hian tumah a ngaithla duh lova. A thawhpuite pawh a pawisa lova, an thu leh hla a ngaichang hek lo. A thiltih hi international community zah lohna a ni. Trump a thutlukna hian Muslim leh Kristiante a hmuhsitzia a tilang a ni” tiin, Jerusalem chu Arabs-Muslim World kuta a awm thlenga an beih tur thu a sawi ve bawk.
Maj. Gen. Mohammed Begheri, Iran military (Guds Forces) hotu chuan, “Arabs-Muslim hnamten fiahna, enchhinna (decisive test) kan hmachhawn mek a ni. Muslim hote chuan Jerusalem chu kan venghim tlat tur a ni a. Jerusalem chona chu kan chhang tur a ni” a ti.
Hetih lai hian Czech Republic leh Philippines ram chuan Tel Aviv atangin Jerusalem ah Embassy sawn an duh tih an sawi a, Czech Republic President Milos Zeman chuan “President Trump chuan election dawna a thutiam anga a thutlukna siam chuan min tihlim hle a ni” a ti thung. Czech Republic hian hman deuh lawk khan Jerusalem chu Israel khawpuiah pawmpuiin, ramri pawh kum 1967 angin, Six Day War an ram lak angin a lo pawmpui tawh a ni.
President Trump hian Dec 6 ah ber kher, kum 70 dawn US-in Israel khawpui atan Jerusalem a puanna a neih ngailoh laia a puang hian, kum 1967 a Six Day War nen a inzawm duh hmel riau mai! Six Day War ah khan Arabs-Muslim ramten Israel ram an do hrawn a nih kha....
Hetih lai hian President Trumpuia ber chuan White House a East Room-ah Judate hun pawimawh lawmna (Hanukkah) hun chu afanu Ivanka leh a fate 3 telin a hman pui a; chumi tum chuan, “Tunah chuan Israel leh Jerusalem chungchang thil thleng ringawt ka ngaihtuah a ni” a ti heu mai. Hemi tum hian Vice President Mike Pence, Treasury Secy Steven Minuchin, Holocaust survivor Louise Lawrens-Israel, Orthodox Jews Rabbi Meir-Soloveichik chauhvin kut an beng e, an tih chu!
Judate tana khawpui rangkachak “Yerushalayim shel zahav”-Jerusalem hian chanchin alo nghahin; khawvel history ala tidanglam dawn chauh a ni@CT Lalrinawma

Post a Comment

Powered by Blogger.