HORNBILL INTERNATIONAL ROCK CONTEST 2017 WINNER AVORA RECORDS
India ram mai ni lo, khawvel hriat hlawh, Hornbill Festival : Festival of Festivals-a mipui ngaihven leh ngaihhlut ber pakhat, The Hornbill International Rock Contest 2017, Dimapur, Nagaland-a neih zawh takah Avora Records chu pakhatna niin Rs. 10,00,000 (10 lakhs) an dawng a, The Prophets chu pahnihna niin Rs. 5,00,000 (5 lakhs) an dawng bawk. Perfect Stick Figure Illustrations (Sikkim) chu pathumna niin Rs 3,50,000 (3.5 lakh) an dawng thung a ni. Pawisa fai bakah hian Winner pathumte hnenah hian Artist Aloud chuan thilpek hlu tak tak an pe bawk a ni.
MIMAL LAWMMAN
Best Vocalist - Ronnie (The Prophets, Mizoram)
Best Guitarist - Ruata Renthlei (Avora Records, Mizoram)
Best Bassist - Gordon (The Prophets, Mizoram)
Best Drummer - Maverick John (Raj Swami of Highway 69, Jharkhand)
BAND MEMBERS
Avora Records, Aizawl (Mizoram) : Stephen Hnamte (vocals), Ruata Renthlei (guitarist), Lalkhawsiama (guitarist), Lalchhhuankima (bassist), Lalsangzuala (drummer)
The Prophets, Aizawl (Mizoram) : Ronnie (vocals), Eric Renza (guitarist), Gordon (bassist), Samuel (keyboards), Mamoia Colney (drummer)
Perfect Stick Figure Illustrations, Gangtok (Sikkim) : Saurav Moktan (vocals), Sameer Pradhan (bassist), Karam Moktan (drummer), Varun Rao (guitarist), Lee Yong Lepcha (guitarist)
REPORT KIMCHANG DEUHIN
Hornbill International Rock Contest (HIRC) ah hian India rama Rock Band tha ber ber 25 an tel a. Preliminary Round hi tunkar thawhlehni zan atang khan tan niin Ningani zan thleng kha neih a ni a. Heta tang hian Rock Band 9 thlan chhuah niin Zirtawpni zan khan Grand Finale neih a ni. Grand Finale ah hian – Avora Records (Aizawl), Genre- Pop Rock; The Prophets (Aizawl), Genre -Progressive Metal; Highway 69 (Ranchi), Genre- Dead Metal, Fluff Paradox (New Delhi), Genre- Dead Metal; Mount Groove (Darjeeling), Genre- Contemporary Jazz; Radio City (Kohima), Genre- Alternative; Yellow Beacon (Dimapur), Genre- Alternative; Doodles (Kalimpong), Genre- Funk Rock; leh Perfect Stick Figure Illustrations (Gangtok), Genre- Alternative te chuan hmingthanna leh Nuai 10 hawn tumin thehtawp an chhuah theuh a. Judge-te chu Uday Benegal (Indus Creed Frontman), Soumini Sridhara Paul (Vice-president, Hungama Digital Media Entertainment Pvt. Ltd) leh Mhaseve Tetseo ( Guitarist Tetseo Sisters, Rattle & Hum band) te an ni.
Hornbill Festival ropui zia chu India mai ni lo, khawvel khualzin mite pawhin an hre tawh a, Hornbill Festival tiropuitu leh tihlutu ber pahniha ngaih chu - War Dance leh Rock Contest- te hi an ni a. Rock Contest zinga lawmman sum fai tamna ber a ni bawk nen, an inbuatsaihna nasat zia te, a tel tur an duhtui dan te, lawmman pawisa fai an phalrai ngam dante, India rama Rock Band tha ber bera kan neihten tel ngei tuma an inbuatsaih nasat dan te leh, a tel te tana inchhuanna tham a tlin zia te - kan sawi bakah thil dang tam takte nen - he Rock Event hi sawi mai aiin a ropui a, India rama rimawi ngaina leh ngaivente ngaihhlut leh ngaihsan a hlawh tak zet a. Hetiang hun leh hmuna kan Mizo Band-ten Lawmman Pakhatna leh Pahnihna an zu hauh thei hi a ropui tak zet a, a hlutna leh ropuina sawi chhuah thiam pawh a har zawk a ni.
THUNAWI
1) Tourism-ah Nagaland Sawrkar an fakawm a, an awhawm a, an thikawm bawk. Kan Winter Festival leh an Hornbill Festival te khaikhin ngam a la ni rih love.
2) Rimawi (Music) tana Nagaland Sawkar-sum chungchanga a inphalna leh hmathlir a ropui. Zaimi leh Rimawi tel lova puipunna buatsaih hleih theih lohna Zoramah hian Sawrkar-in hmathlir a nei lo a ni ber a. Zaimi ber te lah an tangrual thei bawk si lova...
3) Mizo thalai infiammi te tan infrastracture a tha tulh tulh a, rimawi ngaina leh zai mite tan erawh hmasawnna ruhrelh kham hmuh tur a la awm lo. Band tha tak tak kan lo nei tawh thin a, kan nei mek a, kan la nei zel ang, mahse, an thawm a reh zui deuh mai zel. Zoram Music Indutry tana hmasawnna ruhrel kham theih hun a va nghahhlelhawm em!
Posted By: Lalnun Siama Khiangte
Post a Comment