- Zoramthanga


Dt. 1.12. 20017 (Zirtawpni) hian Mizo Hnam Run chhung inkhawmah thusawiin MNF President Pu Zoramthanga chuan, "Inthlan lo awm tur hi MNF tan Lalpa'n hun a ti tawh a ni," a ti.

Pu Zoramthanga chuan, "Inthlan lo awm tur hi Congress-ho hian huphurh namen lovin an huphurh a; Tling zo tawh dawnin an inhre si lova, an theih ang ang an ei mawlh mawlh mai a, kan tlingzo tawh dawn chuang lo, zu pawh truck ke 12 neiin phurlut law law ila, Kolkata-ah pawh In ṭha takin sa law law mai ila an ti tawh a, kawngchhiate hi siam vut vut kher lo ila, theih ang ang hi ṭhahnemngai takin ruh tum mai ila a fuh ber tawh ang an ti a ni ber tawh niin a lang," a ti.

A sawi zelnaah Pu Rama chuan, "MNF hi Culture Society aṭanga din a ni a. Mizo Nationalism-a innghat tlat a nih avangin din a nih aṭangin a ṭhangduang hle a. Assam hnuaia District Council kan nih laiin MLA inthlanah pawh seat thum (3) awmah seat hnih (2) MNF-in a la a. Hetia Mizo Nationalism lo ṭhang chho zel hi Assam sorkar leh India sorkar ngaihmawh tham a lo ni chho ta a. Ram buai pawh kha MNF cho chhuah ni lovin Assam CM Pu Chaliha khan tihluihna hmanga sipai a rawn tirhluh vanga buai kan ni a. Kum 20 chuang hunkhirh tak tak tuar chhuakin hnam movement leh Mizo Nationalism chhi eng turin Lalpa'n kan tan remruatna fel tak a lo nei vek a; MNF sorkar a tlak aṭanga kum 10 chhung training min pe a, Delhi tlânga Congress dinhmun hnuhhniam thlengin kan tan Lalpan kawng min siamsak a ni," a ti bawk.

He hunah hian MSU President kalchhuak ta Pu PC Lalrinhlua leh MSU hruaitu lo ni tawh mi ṭha leh ṭangkai tak tak 8 lawmluh an ni a. Tin, Sihhmui aṭangin voters 21 President Pu Zoramthanga hian a lawmlut a. Thusawiin MSU President kalchhuak Pu PC Lalrinhlua chuan, "MNF kan zawm chhan chu Mizo Nationalism chhi engtu an nih avang leh MSU anga ram leh hnam tana kan lo thawh ve tawhna reng rengah hnam thinlung pu tlat chunga thawk ṭhin chu MNF hi an ni tih kan chiang a, hotute hnung zui turin kan lo penchhuak ve ta a ni," a ti. Lawmluhte ṭawiawma lokal MSU President ni lai Pu RB Lalmalsawma chuan, "MSU hruaitu ṭhahnem tak in lo lawmlut tawh a, tunah pawh kan hruaitu rintlak tak tak lo ni ṭhin in lawmluh leh theihna chhan chu Mizo Nationalism champion puitu in nih piah lamah MSU hruaitu in Party rawn zawmte in lo enkawl danah a innghat a. Thil awmdan azirin mi ṭhahnem takin an la rawn zawm leh dawn che u a ni," a ti bawk.

He hunah hian Pu Vanlalzawma MLA pawhin Committee on Public Undertakings hmalakna-a Bangladesh an tlawh thu report a pe a. Rambuai laia Hnam Sipai engemawzat an phumna thliarkar an tlawh thu a sawi a, rilru a tihthar hle thu leh Evangelist-ten Kross-ah kan kir leh ṭhin a ngai an tih angin, Hnam Sipaite rilru leh ram leh hnam tana an inpekna-ah hian kan kir leh ṭhin tur a ni a, Hnam movement tello chuan MNF Party nihphung hi a kim thei lo a ni," a ti bawk.

Vawiin chhung inkhawm hi Pu D.Thangliana Ex-MLA, NCCM-in a kaihruai a, MNF Founder President Pu Laldenga nupui, Pi Biakdiki'n Hunserh a hmang a ni.

(VARTHANZAMA)
Secretary
Media & Publicity Deptt.
Mizo National Front
Memo No.MNF/Media/2017/146
Dt.01.12.2017.

Post a Comment

Powered by Blogger.