PRESS RELEASE
MNF Ṭhalai chuan, India President Ram Nath Kovind a lo kal avanga Aizawla heti taka traffic a jam nasa hi sawrkar mualphonaah kan ngai a, sawrkarin traffic jam tihziaawmna tura hmalakna awmze nei zawk a neih loh vang ni-ah kan ngai a ni.
Kum 1942-a Pu C. Rochhinga'n Aizawla motor a rawn khalh luh aṭang khan vawiin leh nimin kha Aizawla traffic jam nasat ber niin chinchang hre zawk te chuan an sawi a. Hei hian kum 25 dawn Chief Minister lo ni tawh Pu Hawla leh a kaihhruai Congress sawrkarin Aizawl khawpui tana thil ropui a tih lohzia a tilang chiang hleah kan ngai. Congress sawrkar hian Aizawl traffic jam tihziaawm nan sikul kai hunbi tihdanglam te, motor intlanchhawk te, garage neih vek tur ti tea hma lain experiment tam tak a nei tawh a, hei hian awmzia a nei lo tih hretu chu Zoram mipuite kan ni. Heti taka a ngaihna hre lo sawrkar hi sawrkar zui tlak tawh lovah kan ngai a ni.
MNF khan a sawrkar laiin Aizawl traffic jam tihziaawm nan sawrkar pisa pawimawh chu New Capital Complex-ah a sawn chhuak a, lirthei liante dinna hmun tur khawpui daifemah a din bawk a, Aizawl khawpui helna turin World Bank road kan tih tak hi a sial bawk. Khawpuia Assam Rifles awmte sawn chhuaka an awmna hmuna lirthei park-na hmun tur zau tak siam tumin ruahmanna a siam bawk a ni. Chutiang a nih laiin Congress sawrkar chuan Aizawl traffic jam tihziaawmna tura hmalakna awmze nei zawk leh lian tham zawk a nei lo va, vawiina Mizote hian kan tuar tlâng ta a; India ram hruaitu lianin Mizoram an rawn tlawh changa lemchan a ngai ziah mai hi sawrkar hlawhchham zia diktak a ni a, hei ringawt pawh hi Congress sawrkar paihthlakna tham a tling niin MNF Ṭhalai chuan kan ngai a ni.
Sd/-
(K.C. LALTHANSANGA)
General Secretary
Publicity Department
Memo No. 048/MNYF/PR/2017-18
Dated Aizawl 30th November, 2017
Post a Comment