MNF tan Lalpa'n hun a ti tawh - Zoramthanga

MNF president Zoramthanga chuan nimin khan Mizo Hnam Runa inkhawmah thu a sawi a, "Inthlan lo awm tur hi MNF tan Lalpa'n hun a ti tawh a ni," a ti.

Zoramthanga chuan, inthlan awm leh tur chu Congress partt-in namén loin an huphurh nia sawiin, "Tling zo tawh dawnin an inhre si lo a, an theih ang ang an ei mawlh mawlh mai a ni," a ti a; kawng chhia pawh siam vut vut loh a, a theih ang ang ṭhahnemngai taka ruh an tum tawh niin a sawi.

MNF party chu culture society aṭanga din a nia sawiin Zorama chuan, "Mizo nationalism-a innghat tlat a nih avangin din a nih aṭangin a ṭhangduang hle... MNF sorkar a tlak aṭanga kum 10 chhung training min pe a, Delhi tlánga Congress dinhmun hnuh hniam thlengin kan tan Lalpa'n kawng min siamsak a ni," a ti.

MNF treasurer Vanlalzawma pawhin thu sawiin, hnam movement tel lo chuan MNF party nihphung a kim thei lo tih a sawi.

MNF President hian nimina an inkhawmah hian an pary zawm thar, Mizo Students Union (MSU) president hlui PC Lalrinhlua leh MSU hruaitu hlui dang ṭhenkhat a lawm lut a; Sihhmui aṭangin voter 21 a lawm lut bawk niin MNF thuchhuah chuan a tarlang. -Vanglaini