Mizoram Football Chanchin: Football TITI MIZORAMChhinga coach Sanga'n a sawifiah

Mizoram Premier League Season 6 final luh inchuhnaah Chhinga Veng coach Lalsangzuala Hmar-in player pawimawh Malsawmfela, MS Dawngliana leh Laldampuia te bench-ah a dah a, Chhingcows boss hian Vanglaini hnenah awmze neia thutlukna an siam thu a sawi.

MPL6 final hi December 8, Zirtawp zanah khelh a ni dawn a, Chhinga Veng hian nizana Aizawl FC leh Mizoram Police inkhela chak zawk an hmachhawn ang. Chhingcows hian final lut turin November 30 zanah Chanmari FC 3-1 in an hneh a, final atan hahdamna hun ṭha an nei bawk.

Chhinga Veng coach Sanga chuan, "MPL hi season rukna a ni tawh a, tuna player ṭha tam tak hi season khatnaa player ṭha thote kha an ni. Hei vang hian player-te an inhrechiang em em a, game plan pawh uluk a ngai. Inkhel bul ṭantu Mapuia, Apuia leh 

Dingngheta te kha player ṭha vek an ni a, tharum an ngah bawk avangin Chanmari player-te chhaih chau turin an lut a, minute 90 chhunga chak zawk nih kha kan tum a ni," tiin final lut tura an hmanhmawh loh thu a sawi.

An game plan a hlawhtlin thu sawi chhunzawmin Sanga chuan, "Hmahruaina goal Patea tauhluh kha Dampuia siam sak a ni a, goal thumna kha Dawngtea pass aṭanga Sawmfela penalty hlawhchhuah a ni. Bench aṭanga lut player pathumten tawnhriat an ngah a, pressure sangah an buai lo a, an hna ṭha takin an zo a ni," tiin Vanglaini a hrilh.

Chhinga Veng hian Sanga hnuaiah MFA Super Cup leh I Day Football an chawi tawh a, tun season-ah competitive match 28 an khel tawh a, tualchhung club zinga match khel tam ber an ni. Sanga chuan, "MPL hmain inelna pahnih kan khel tawh a, kan naute hian chawlh an mamawh. Final atana chawlhna hun tam zawk kan nei hi kan vannei a, kan chak dawn tih erawh a kawk lo. Police leh Aizawl FC te hi team ṭha ve ve an ni a, tum châkawm zawk pawh an awm lo. Champion tur chuan rim taka kan thawh a ṭul ang," tiin chawlh hun a nei rei chu lawmawm a tih thu a sawi. Vanglaini

Post a Comment

Powered by Blogger.