Lawngtlai District khaw pathuma Myanmar mi raltlan lo lutte chu an khawsak lailawkna tur sak sak an ni tawh a, Lawngtlai District bawrhsap Pu Arun T. chuan raltlan lo lut mi 1,600 bawr vel hi a theih ang angin sorkar chuan a tuamhlawm zel a ni a ti a, an chenna tur relief camp sak a nih bakah eitur buhfai pek an ni a.
Hri leng a awm lohna'n doctor pahnih leh an thawhpui midang pali-in a hmunah an vil reng a, a tul angin damdawi pawh a thlawna sem a nih thu bawrhsap chuan a sawi a, hri a len an hlau hle niin a sawi.
Venhimna lam chu Assam Rifles leh Police-in khauh takin an kengkawh niin a sawi bawk; Myanmar sipaite'n Arakan Army hel pawl laka beihpui an thlak chiam avangin Inrinni hmasa atang khan Mizoram dep Myanmar ram chhung a nunau thahnem tak chu Lawngtlai District-ah an rawn tlan chhia a.
Himna zawnga an rawn luhna hi Laitlang, Zochachhuah, Hmawngbuchhuah leh Dumzauthang khua te a ni a, Lirthei a tlawh hleih theih loh khawpa pilril a nih hlawm avangin a hmuna kal sorkar official-te'n harsatna an tawk nia thudawn a ni.
Myanmar sipai leh Arakan Army helte an inkah zeuh zeuh avang hian helai bial vela awm nunau hi an rawn tlanchhe fo tawh a, tun tum hi an tam ber tum leh vawi li an rawn tlanchhiatna a ni tawh a ni.
Post a Comment