Mizo Special Report

MYANMAR MI RALTLAN MIZORAM CHHUNG RAWN LUT Lawngtlai district khaw pathum a Myanmar mi raltlan lo lutte chu an khawsak lailawkna tur sak sak an ni tawh.
Lawngtlai district bawrhsap Pu Arun T. chuan raltlan lo lut mi 1,600 bawr vel an awm thu sawiin "heng raltlante hi a theih ang angin sorkar chuan a tuamhlawm zel a ni" a ti. Burma mi raltlante hi an chenna tur relief camp sak sak a nih bakah eitur buhfai pek an ni a. Hri leng a awm lohna’n doctor pahnih leh an thawhpui midang pali-ten a hmunah an vil reng a, a tul angin damdawi pawh a thlawna sem a nih thu bawrhsap chuan a sawi. Hri a len an hlau hle niin a sawiin venhimna lam chu Assam Rifles leh Police-in khauh takin an kengkawh niin a sawi bawk a ni. 


Myanmar sipaite’n Arakan Army hel pawl laka beihpui an thlak chiam avangin Inrinni hmasa November ni 25 atang khan Mizoram dep Myanmar ram chhunga nunau tamtham tak chu Lawngtlai district-ah an rawn tlan chhia a. Raltlante hi Laitlang, Zochachhuah, Hmawngbuchhuah leh Dumzautlang khuaahte himna zawngin an rawn tlanchhia a ni. Heng khuate hi lirthei a tlawh pawh hleih theih loh khawpa pilrilte an nih hlawm avangin a hmuna kal sorkar official-te’n harsatna an tawk nasa hle nia thu dawn a ni.
Myanmar sipai leh Arakan Army helte an inkah zeuh zeuh avang hian helai bial vela awm nunau hi an rawn tlanchhe fo tawh a, tun tum hi an tam ber tum leh vawi li an rawn tlanchhiatna a ni tawh niin thudawnna chuan a sawi.

MYANMAR MI RALTLAN MIZORAM CHHUNG RAWN LUT MYANMAR MI RALTLAN MIZORAM CHHUNG RAWN LUT


Post a Comment

Powered by Blogger.