Bank account hralh chhawng lo turin Police-in mipuite hriattir - TIMES OF MIZORAM

Breaking

Home Top Ad

Post Top Ad

Bank account hralh chhawng lo turin Police-in mipuite hriattir

bank account hralhMizoram police-a public relations officer (PRO) chuan thuchhuah siamin, bank account hralh chungchanga mipui hriat tur pawimawh an tarlang a; bank account hralh chungchanga finfiahna/information hriat neite chu CID (Crime) telephone no. 0389 – 2334082 ah hriat­tir turin an ngen.

Police PRO thuchhuah chuan, hun eng emaw aṭangin Facebook, email, phone leh internet, etc. kaltlanga inbumna a hluar hle tih sawiin, chutianga inbumna laka mipui an him theih nan leh fim­khur theih nan police-in thuchhuah an siam fo tawh thu a tarlang a, "Vawiin thlengin harsatna sawi tham tak a la ni reng a, Mizote zingah a tuartu eng emaw zat an awm tawh a ni," a ti.


Police thuchhuah chuan, bank account, inter­net leh social media hmanga mi bum hmang­te'n thiam takin mi chinchang hre lo zawkte bumin, sum pek tlak hmasak tur an inthawntir ṭhin tih sawiin, "Misualte hi biak zui tur awm loin, pawisawi lo bum tâwkte hian an sum leh pai tam tham takte an chân phah ṭhin a ni," a ti a; mi bum ṭhinte chuan anmahni bank account an hmang ngai lo a, an nihna hriat theih lohna turin mi dang bank account an hmansak ṭhin tih a tarlang.

Police-te chuan mipui­te chu fimkhur tura chahin, "Kan bank account-te tu'ma hnena hralh emaw, hmantir loh tur a ni. Misualte hman theih tura bank account kan hralh hian thil sual kan tih bakah, misual vulh lenna a ni a, a hralhtu ngei pawhin mawhphurhna rip tak a neih theih phah ṭhin a ni," an ti. -Vanglaini

No comments:

Post a Comment

Post Bottom Ad