Mizo tlangval Lallianzuala a langsar:
Mizo Footballer Lallianzuala Chhangte

"I thinlung zawng zawngin LALPA ring la, Nangma hriatnaah innghat suh; I kawng zawng zawngah amah hre reng la, I kawngte chu a kawhhmuh zel ang che" tih thu hi Lallianzuala Chhangte-in Bengaluru laka goal a khung hnua India rama mipui tam tak hmuh theih tura a phochhuah chu a ni.

Pathianni zan khan Delhi Dynamos chuan an mikhual Bengaluru FC chu 2-0 in an hneh a, minute 72-naah Lallianzuala chuan goal hmahruai a khung - Lunglei tlangval hian a goal khung lawm nan a kawr a hlim a, chuta inziak chu Proverbs (Thufingte) 3:5-6 tih a ni. Lianzuala hi Hero of the Match-ah thlan zui a ni bawk.

Delhi goal dang hi Guyon Fernandez-a'n penalty aṭanga a khung a ni a, penalty chawitu Subhasish Bose chu hnawhchhuah a ni.

Lallianzuala'n a goal khung lawm nana Bible chang a tarlanin ngaihven a hlawh a, Lunglei tlangval chuan "Thufingte 3:5-6 thu hi ka nun innghah nan ka hmang ṭhin a, training kan ṭan hmaa ka ṭawngṭainaah hian he thu hi ka chham tel ziah. Bengaluru lakah goal ka khung ve tak mialin tiin tarlan tum takin ka ziak a, tarlanna hun remchang ka nei ta a ni," tiin Vanglaini a hrilh.

Mizo Footballer Lallianzuala ChhangteIndia tana vawi li inlan tawh forward chuan, "Team tana goal khung a, hnehna chanpui chu thil nuam tak a ni. Mahse, hmabak tam tak ka la nei a, theihtawp chhuah chhunzawm zel ka tum a ni. Beisei angin season bul kan ṭan lo a, semifinal lut tur chuan match tinah hnehna kan chan a ṭul tawh ang," tiin Vanglaini a hrilh bawk.

Pathianni zan inkhel dangah Kerala Blasters chuan an mikhualna ramah 1-0 in Mumbai City an hneh a, goal awmchhun hi David James enkawlna hnuaia harhtharna chang mek Ian Hume-a khung a ni.

Blasters tan ṭum dang ang bawkin Lalruatthara a langsar a, Hmunhmelṭha tlangval hi tlarhnungah Kerala club tan ban rinawm niin Emerging Player of the Match-ah thlan a ni.-Vanglaini

Post a comment

Powered by Blogger.