mizoram election voter awm zatMizoram electoral roll thar chu nimin khan district headquarters hrang hrangah tlangzarh a ni a; Mizoram electoral roll tharah hian voter 7,57,854 an awm a, mipa aiin hmeichhe voter 16,765 in an tam zawk.

Special Summary Revision of Photo Electoral Roll 2018 hi September 2017 aṭang khan kalpui ṭan a ni a, ruahman lâwk angin nimin khan târ chhuah a ni.

Electoral roll tharah hian January 1, 2018-a kum 18 tling chinte thun a ni a, roll thar hi kumin chhung zawnga hman tur niin, kumina Assembly inthlan huna hman tur a ni.

Aizawl district bika electoral roll thar chu Aizawl District Electoral Officer, bawrhsap pisaah tar chhuah a ni a; tlangzarhna inkhawmah hian political party tin aiawhte telin, party tinte hnenah electoral roll thar chu pek nghal a ni.

Aizawl district-ah chuan roll tharah hian voter 2,84,267 an awm a, mipa 1,35,376 leh hmeichhia 1,48,891 an ni. Electoral roll hluiah voter 2,78,395 an awm a, roll hlui aiin roll tharah hian voter 5,872-in an tam zawk a, a punna chu 2.11% a ni. District chhunga Assembly constituency 14-ah polling station 326 a awm.

Lunglei district-ah chuan DC Conference Hall-ah additional DC Benjamin Lalzama'n Lunglei district electoral roll a tlangzarh a, tlangzarhna inkhawmah election official-te bakah, political party hruaitute leh MJA hruaitute an tel.

Lunglei district-ah hian Assembly constituency pasarih a awm a, chu'ngah chuan voter 1,03,577 awmin, mipa 51,635 leh hmeichhia 51,942 an ni a; draft roll hnuhnung bera voter 1,01,824 aiin voter 1,753-in an pung a, an punna percentage chu 1.72% a ni. Voter pun tamna ber chu South Tuipui bial niin, 2.36%-in an pung a, pun tlemna ber Thorang bial a ni. Service voter 324 an awm bawk.

Champhai DEO Vanlalngaihsaka, district bawrhsap ni bawk pawhin nimin khan a pisaah Champhai district electoral roll thar a tlangzarh a; electoral roll thar chu political party-te hnenah sem nghal.

Champhai district lectoral roll tharah hian voter 82,851 an awm a, chu'ng zinga 41,128 chu mipa niin, 41,723 chu hmeichhia an ni. Roll tharah hian nikum aiin voter 1,596-in an pung a, punna percentage chu 1.9% a ni.

Serchhip District Election officer Sangchhin Chinzah, district bawrhsap pawhin an district electoral roll chu a pisaah a tlangzarh a, roll thar chu tlawmngai pawl leh political party-te hnenah a hlan nghal.

Electoral roll tharah hian Serchhip district-ah voter 48,881 an awm a, mipa 24,052 leh hmeichhia 24,829 an ni.Service voter 201 an awm bawk. Roll thara voter zat hi kum 2017 roll aia 981-in a pung a, a punna hi 2.06% a ni.

Lawngtlai district electoral roll 2018 chu district bawrhsap mawhphurhna la mektu H Dolianbuaia'n DC Conference Hall-ah a tlangzarh. Tlangzarhna hunah hian ERO, AERO, BLO leh political party hrang hrang aiawhte an tel.

Lawngtlai district roll tharah hian voter 79,207 an awm a, mipa 39,581 leh hmeichhia 39,626 an ni. Roll tharah hian roll hlui aiin voter 1,483-in an pung a ni.

Mamit additional DC H Lianzela pawhin nimin khan Mamit district electoral roll a tlangzarh a, election official-te bakah, tlawmngai pawl YMA, MHIP, MUP leh political party aiawh pathumte an tel. Roll thar chu political party - Congress, MNF leh BJP-te hnenah hlan nghal a ni.

Mamit district electoral roll tharah hian voter 64,165 an awm a, mipa 32,615 leh hmeichhia 31,550 an ni. Electoral roll 2017 aiin roll tharah hian voter 1,486-in an pung a, punna percentage chu 2.37% a ni.

Siaha DC pisaah pawh Siaha district electoral roll thar tlangzarh a ni. SIaha district roll tharah hian voter 38,526 an awm a, chungte chu mipa 18,788 leh hmeichhia 19,739 an ni. Kum 2017 electoral roll aia 2018 electoral roll-a hian voter punna chu 1.41% a ni. -Vanglaini

Post a comment

Powered by Blogger.