Mizo naupang  J H Lalhruaizela A ChampionNorth East Tennis Championships 2018 khelh mekah Mizo naupang JH Lalhruaizela chu kum 14 hnuai lam inelnaah a champion. Ningani khan JH-a hian khawtual naupang Debanga P Hazarika chu 6-1, 6-3 a hnehin state pawnah a vawi khat nan champion nomawi a chawi.

Golaghat, Assam-a inelna neihah Ramhlun Sports Complex naupang JH-a hian round hmasa lamah Aditar Saikia (6-0) leh Bhasanta P Borah (8-4) te lakah harsatna a tawk lo. Semifinal-ah seeded pakhatna leh tualchhung naupang ni bawk Tushar Paul chu 6-4, 6-4 in a hneh bawk.

JH-a hian nikum kum tawp lam khan Mizoram Tennis Association hnuaia inelna ngaihhlut ber Lalzuia Open (Under 16) nomawi a chawi tawh bawk a, tualchhung tennis kum bithilah inelna a inlan tawhna chinah chuan a champion vek tawh.

JH Lalhruaizela chuan, "Pathian chungah lawmthu ka sawi, clay court-ah ka vawi khat khelhna a ni a, ka champion nghal thei hi ka lawm takzet. Tun hun ka thlen theih nana min kaihruaitu ka nu leh pa bakah MTA chungah ka lawm takzet," tiin Vanglaini a hrilh.

Nikum February thla khan JH Lalhruaizela hi Saitual naupang Lalrinmawia nena į¹­angdunin Khelo India Tennis Tournament doubles-ah bronze medal an la a, MTA hnuaia national medal hlawh chhuak hmasa ber an ni.-Vanglaini

Post a comment

Powered by Blogger.