National Football Championship for Santosh Trophy vawi 72-na khel turin nimin khan Mizoram chuan Assam 3-0 in an hneh a, NorthEast Zone qualifying round thlengtu Mizoram hi group A hmahruaitu an ni.
Nimin inkhelah hian Mizoram tan Lalromawia goal hnih bakah captain R. Malsawmtluanga'n freekick aṭangin a khung a, Lalsangzuala Hmar hote hian qualifying round-ah goal nga khungin goal an chhuah lo.
Team siksawi
Mizoram coach Sanga'n Arunachal Pradesh 2-0 a an hneh zawhah team siksawi a ṭul thu Vanglaini a hrilh a, Assam nen an inkhelh ṭumin starting eleven-ah player pali thlak an ni.
Tlarhnungah PC Laldinpuia leh Hmingthanmawia te khelhna hun siam sak an ni a, defence laia ding ṭhin Dinpuia chu right back-ah awmin Hmingtea chu a khelh ṭhanna left back-ah chhawr a ni.
Tlarhma lamah Lalrammawia leh MC Malsawmzuala ten bul an ṭan ve bawk a, mual sir lama awm zingah Lalmuanzova chiah a inlan nawn. Siaha tlangval MC-a hi Romawia'n a puiin midfield laiah captain R. Malsawmtluanga leh Lalrinchhana te an inkawp.
Defence laiah Lalrinchhana Tochhawng leh H. Lalhlimpuia te an inkawp nawn a, MPL6 best goalkeeper F. Lalmuanawma chu goal veng tura dah nawn a ni bawk.
Goal chance a tam
Mizoramin goal an nawr na nghal a, minute 10 chhungin goal khung theihna tur chance ṭha ṭum hnih an nei hman. Passing game hmanga Assam tlarhnung an ṭhiah darh hnuah Muanzova'n a ball khawih fuh tawk loh vangin goal-ah a chantir thei lo a, hemi hnua defender Rinchhana ball pet chu goalline aṭangin Assam defender-in a dang hman bawk.
Assam lamin chak tumin an khel ve tho a, Mizoram tlarhnung a phui bik lo. Milan Basumatary-a'n goal khung theihna turah goal zawnah a pet lo a, defender Aula Kanheya-a'n corner aṭanga ball kal chu tauh fuh mah se goal zawnah a kal lo.
Samlukhai tlangval
Mizoramin goal an mamawh a, Samlukhai tlangval Lalromawia chu mamawh chhanna a ni.
Minute 22-naah Rammawia'n dinglamah a tharum leh a thiamna hmang ṭangkaiin box chhungah ball ṭha a vawrh lut a, MC-a'n Romawia tan pe lehin Samlukhai tlangval hian Mizoram tana a goal hmasa ber chu goal kilah tak a khung.
Hemi hnu hian Romawia'n Muanzova ball pek ṭha bik khung lo mah se minute 33-naah a goal hnihna a khung a, hei pawh hi Rammawia thawhrah bawk a ni. Sawleng tlangval Bethlehem Vengthlanga cheng Rammawia hian thui tak a khalh hnuah Romawia a pe a, Samlukhai tlangval hian cool takin a tawp a rawn khar.
Captain MS-a
MPL6-a Chhinga Veng champion puitu R. Malsawmtluanga'n Santosh Trophy a vawi khat khelhnaah Mizoram captain armband a hreng nghal a, Arunachal lamah goal hmahruai a khung hnuin Assam lamah chak nemnghetna goal a khung.
Minute 53-naah MS-a hian freekick aṭangin a khung. Darlawn tlangval hian MFA Super Cup, I Day Football leh MPL6-ah Chhinga Veng FC a champion pui tawh a, Santosh Trophy-ah Mizoram hruai thleng lehin final round chiah hmabak a nei ta.
Bang rinawm Muanawma
Mizoramin goal thum an khung a, scoreline mawi taka an chak theih chhan erawh keeper F. Lalmuanawma a ni. Khawbung tlangval Muanawma hian first half-ah save ṭha bik ṭum thum a nei a, Santosh Trophy top scorer ni tawh Akum Ao a tih beidawn bakah Milan Basumatary-a goal hnih khung tur a dang ve ve.
Hei chauh hi a ni lo, Mizoramin goal thumna an khung zawh chiahah penalty an chawi. Assam tan veteran striker Akum Ao pen chhuakin goal kilah pet mah se Mizo tlangval Muanawma'n a dan sak a, Mizoram goal venhimin a awm.
Goal thum chauh
Football-ah goal thum hi a tlem lo a, nimina an inkhelh dan thlir chuan goal thum chauh a lut hi a mak zawk.
Mizoram leh Assam te hian attacking football a khel ve ve a, tlarhnung a phui loh avangin chance ṭha pawh an ngah a. Assam lamin penalty an hlah ang thoin Mizoram pawhin penalty an hlah.
Muanzova penalty hlawhchhuah chu MC-a'n a vawi khatnaah khung mah se Rammawia penalty area-ah a tlanluh hman avangin pet ṭhattir a ni a, penalty vawi hnihna hi Assam keeper Arup Baruah-a'n a dang.
Hmasawn tum Mizoram
Mizoram coach Lalsangzuala Hmar chuan, "Final round kan thleng thei hi kan lawm a, kan hmachhawp hmasa ber kan zo. Amaherawhchu final round khel tur chuan inzir tur kan la ngah hle," tiin an khelh danah a lawm tawk lo.
MPL6-a Chhinga Veng champion puitu coach Sanga chuan, "Kan tlarhnung a phui lo. Kan tana thu lawmawm chu inzirna hun kan la ngah a, hei hi ṭha taka kan hman a ngai ang. Champion beisei ngam tur khawpin kan la inzir hman ka ring," tiin Vanglaini a hrilh.
Mizoram coach Sanga hian inkhel entu mipui chungah lawmthu a sawi tel bawk.
-Vanglaini
Post a Comment