TUICHANGRAL FOOLBALL & VOLLEY BALL CHAMPIONSHIP, 2018 TAN

Nizan khan N.Mualcheng bazar tualah Tuichangral Football & Volleyball Championship, 2018, bialtu MLA Pi Vanlalawmpuii Chawngthu, Minister of State bul tuma buatsaih hawnna hun hman a ni a. Pu K. Saitluanga, MIS, IPRO, Serchhip District chu khuallian a ni.

Pu V. Lalfakzuala, President, Tuichangral Games & Sport Association kaihhruai a hawnna inkhawmah hian Pu K. Saitluanga chuan, Hrangturzo Constituency bialtu MLA Pi Vanlalawmpuii Chawngthu, Minister of State inphalna leh thahnem ngaihna chu fakawm a tih thu sawiin, bial mipuite an vannei tak zet tih a sawi a. He lai bial hi football a India International Player langsar Jerry Zirsanga chawrchhuahna, tuna Indian Super League player langsar Sena Ralte te, I-league player langsar Danmawia te, bakah Mizoram Premier League Player engemawzat thawnchhuak thei bial a nih avangin he bialah hian talent a awm a, a haichhuahna kawnga nasa zawka hmalak chu kan tih makmawh nia a hriat thu sawiin, chutiang hmalakna atana Pi Vanlalawmpuii Chawngthu inhuamna leh Games & Sports Association hruaitute thawhrimna chu a ropui hle a ni, a ti. Pu K. Saitluanga hian infiammite chu infiamna ti ve ngailo te aiin an rilru leh taksa a feiin a chak zawk fo nia a hriat thu sawiin, infiam mi kalkhawm te chu zuk leh hmuam leh ruihtheih thil a fihlim chunga bei zui zel turin a ngen a ni.

Infiamna Khawvel - TUICHANGRAL FOOLBALL & VOLLEY BALL CHAMPIONSHIP, 2018 TAN

He Championship hawnna inkhawmah hian Pu Lalremruata Ralte, Chairman, Serchhip District Sport Committee pawhin thusawina hun a hmang a, Pu Lalpianthanga VCP, N. Mualcheng chuan infiammi kalkhawmte lawmna thu a sawiin Pu. Hauhnunpuia, Treasurer Tuichangral GSA chuan technical report a pe a, Tuichangral Idol 2nd runner up Cindy Lalrinhlui leh zaithiam dangten hun an hmang bawk.

Tuichangral Football & Volleyball Champioship, 2018 ah hian Tuichangral leh a chhehvel khaw hrang hrang 12 atangin Infiammi engemawzat an fuankhawm a, Football Team – 7, Mipa Volleyball Team - 12 leh Hmeichhia Volleyball Team - 6 an inlan dawn a ni. Heng Team te hi Group hrang hranga then niin an inkhel kual ang. A hawnna inkhawm hi nizanah neih nimahse match hi nimin atang khan khelh tan a ni tawh thung a; Final match leh a kharna hun chu Dt 23rd January, 2018 khian Championship bul tumtu Pi Vanlalawmpuii Chawngthu, bialtu MLA leh Minister of State ni bawk hova neih tur a ruahmanna siam a ni.-DIPR