MIZO RIT CHAWI CHAK JEREMY LALRINNUNGA'N YOUTH LEH JUNIOR AH NATIONAL RECORD A SIAM - Thangkhuma (T-a)
23rd February, 2018 (MSR) : Mizo ritchawi chak Jeremy Lalrinnunga chuan Youth leh Junior-ah national record siamin a vaiin kg 246 a chawi a, Jacob Vanlaltluanga'n silver dawngin Zakhuma'n bronze medal a la bawk.
Vishakapatnam, Andra Pradesh-ah mipa leh hmeichhia National Youth (sub junior) leh mipa leh hmeichhia Junior inelna neih a ni a, ni hnihnaah Govt Complex rawlthar Jeremy chuan Youth leh Junior-ah Gold medal lain, kg 56 huangah National record ding lai a khum a, kg 115 char nghalin awma dah phawta chawi kanah kg 131 a thei bawk a, a vaiin kg 246 a chawi a ni.
Kg 62 huangah Mizo rawlthar dang Jacob-a chuan a vaiin kg 242 a chawi ve thung a, kg 110 char nghalin awma dah phawta chawiah kg 132 a thei bawk a, pahnihna niin silver medal a dawng.
Jeremy-a telna huang youth kg 56-ah Zakhuma'n bronze medal la bawkin, kg 101 a char nghal thei a, awma dah phawta chawiah kg 125 thei bawkin a vaiin kg 226 a chawi a ni.
Mizoram aiawhin ritchawi chak hmeichhia 8 leh mipa 4 an vaiin 12 an feh chhuak a, niminah mipa an che tha hle a, gold, silver leh bronze pakhat theuh lain Mizo team hian coach K Zonunsanga, Mizoram State Sports Council leh manager Malsawma Khiangte, Sports and Youth Services-ten an hruai a ni.
He championships-a tithate hi India aiawh tur an ni dawn a, April 20 atanga 30 chhungin Asian Youth Olympic Qualification Urgench, Uzbekistan-ah an tel ang. Asia khawmualpui inelnaa an chet that dan a zirin October 6 atanga 13 chhungin Argentine khawpui Buenos Aires-ah Youth Olympic Games an hmachhawn thei dawn a ni. - Vanneihthanga Vanchhawng
Post a Comment