MNF VIGILANCE-IN F.I.R THEHLUT
Ni 22.2.2018 (Nlaithawhṭan) hian MNF General Headquarters Vigilance Committee chuan Anti Corruption Bureau (ACB) SP, Pu John Zothansanga hnenah FIR an thehlut a, Nalanda Institute of Advanced Studies (NIAS) kaihhnawiha Mizoram Youth Commission (MYC) leh Mizoram Building and Other Construction Workers and Welfare Board (MBOCWWB)-ten dan kalha MBOCWWB sum an hman leh he sum NIAS kaihhnawiha tihchingpen chungchangah thil pathum chhuichhuak tura ngenna ziakin an thehlut a ni.
NIAS kaihhnawiha sum tihchingpen a nih chungchangah hian -
(1) Ni 23.2.2017-ah Chief Minister-in Media-te hnenah NIAS-in Mizoram Advocate General kaltlangin Rs.4,20,000/- ṭheuh cheque 10, a vaiin Rs.42,00,000/- a rawn peklet thu a sawi chu Chanchinbute pawhin an lo chhuah a, ni 16.11.2017-a LESD&E changtu Minister-in Assembly-a zawhna a chhannaah, "NIAS Kolkatta-in Mizo zirlaite zir man Mizoram sorkarah a la rawn pe let lo" tiin a chhang leh bawk si a. He cheng nuai 42 hi NIAS-in a rawn pe let a nih si chuan MBOCWWB sumah emaw, Mizoram sorkar sum bawmah emaw a lut ngei tur a ni a, heng pahniha a lut lo a nih si chuan tunge sum hi lo chheprelh tih a rang thei ang bera chhui chhuak turin ngenna an siam a.
(2) MBOCWWB Fund hi an dan dinglaiah chuan Board member-te chauha hman theih a nih laiin, Board member ni miah lo NIAS-a zirlai 32-te tana hman a ni hi a tidiklotu chhui chhuak tur leh,
(3) NIAS-a kum 3 Course zir tura zirlai 32 tirh nana sum ngai zat Rs.1,28,19,200/- lai mai chu kum thum chhungin kumtin installment-a pek theih reng a nih laiin ni 43 chhung lek, ni 5.8.2014-ah Ist Installment Rs 66,09,900/-, ni 15.9.2014-ah 2nd Installment Rs.4,40,660/- leh ni 16.9.2014-ah 3rd Installment Rs.57,68,640/- an pe fai vek mai hi NIAS leh Mizoram sorkara mawhphurtute inkarah hnungthak inhiahtawnna a awm ngei nia ngaiin a mawhpgurtu chhui chhuak ngei turin ngenna an thehlut a ni.
Pu John Zothansanga SP, ACB chuan MNF hruaitute hnenah hmalak a nih nghal tur thu a lo hrilh a, thehluh a nih ni la la hian an dan angin Mizoram sorkar Vigilance-ah thlen phawt a nih tur thu a lo hrilh a ni.
Hemi chungchangah hian MNYF Headquarters chuan khawpui lunlaiah poster tar hnatlang an lo nei nghal bawk a ni.
FIR thehluhnaah hian MNF General Headquarters Secretary rual, Vigilance Committee member te, MNYF Hqrs. Vice President hovin GS leh Secretary-te an tel a ni.
(LALTHANZUALA HNAMTE)
Secretary
Media & Publicity Dept
Mizo National Front
Memo No.MNF/Media/01/2018/178
Dt.22.02.2018.
Post a Comment