OPEN LETTER TO VAIHLO DOTU LALNU

VAIHLO CHUNGCHANGA LEKHATHAWN


Ka pi, Official deuh tak pawha ziak loin ka sawi tum hi ka'n sawi nghal thawr mai ang e.
.
I pasal lalna hnuaiah Mizoram hi a term hnih nan kum 10 dawn chu kan kal ta reng mai. Vaihlo, zuk leh hmuam i do nasatzia leh i duh lohzia ka hmuh ṭhin hian fakawm ka ti ṭhin lutuk che. Mahse, vaihlo do nasa bertu hnena vaihlo fak ang hiala i hnena pena ziah loh thu ka rawn thawn tur che erawh ka inthlahrung viau a. Ka inthlahrunna hian PWD lei dawh a chim vanga a changtu Minister inthlahrun lohna ang tal kha chu a tluk ve hial pawh ka ring.
.

Kan khua leh a chhehvelah nikum lam aṭang khan kumpui lingletin chhungkaw tam takin sawhthing an ching a. Kg-ah Rs 20 tal pawha laksaktu an hmuh zawh loh avangin an hawihai nasa khawp mai. I huat ber vaihlo chingho erawhin tunah hian kg 1 ₹250 chuang fein an hralh chur chur mai a. Kuthnathawktu rethei, Sorkar-in Sakawr pakhat Cheng nuai 10 man lek a leia chuang pha ve lo tur tan chuan rilṭam laia 'mana' dawng ang maiin an hlim nia.
.
I huat ber vaihlo hi an thawh hah man tel ve nana mi rethei te tein an lo hman a, an lo hlimpui ve hi na i tiin zuk leh hmuam lama insum tur tea ṭan lak lehzual ngaiin i hria em tih ka hre chak ngawt mai. Ka pu Kaphminga'n,"Pukpui ram ṭha in tih saw ka ten," a tih aia nasain Vaihlo hmun ṭha laileng chu i ten ve ngawtin ka ring ṭhin. Chhungkaw ṭhenkhat phei chuan quital eng emaw zat an thar nghe nghe a. Khaw ṭhenkhat phei chuan Zo-carbon truck thlawk thei ni khat phur lek ang kha chu an thar ve nil nial bawkin ka ring.
.
I rilru a tihnat ka ring viau nain hrilh ve hram che ka duh sia. Lo chhiar ve mai rawh aw.
.
Hralhna mumal tak awm se chuan NLUP sum bawm haihawnga nuai khat dawng kher lo pawha cheng nuai khat aia tam la lut thei tur Sawhthing ching tam tak an awm a. Mahse, hralhna tur a awm miau loh avangin an cho ngam lo a, anmahni thawhchhuah ngei hmanga sum lalut ve thei tur pawha inhai veng thiam lo te te khian 'sorkarin hralhna a ngaihtuahsak' an mamawh ngawih ngawih tih hi in pa lo hrilh ve ta che. An thawhchhuah hralhna ngaihtuahsak lo va, thawk lova nuai khat dawn theihna in sawi hmuh zel chuan hnam thatchhiaah min siam thuai ang a, mipui sum tur aṭanga a ruk deuha hlawkna hmuh ve inbeiseiin Bhavan bang nghenga hmai lei siin an lut hum hum ringawt ang tih ka lo hlau ve mai mai a, chuvang chu a nia ka rawn hrilh kher che ni.
VAIHLO CHUNGCHANGA LEKHATHAWN.
Ih e ka pi, i lo hriat loh takin thingtlang mite hi an taima khawp asin. Hralhna tur awm lo sawhthing leh Lentepal ilo vel inrawn chintir a, hah bak hlep awm lo ai chuan hrisel i tih loh ber mai Vaihlo chin hi a hlawk tlat mai si a. Sum lakluhna awmchhun deuh thaw a nih si avangin inthlarung deuhin vaihlo man an chhiar nui leh vur vur ṭhin a ni tih lo hriatsak la, lo hre thiam hram teh aw. Dik taka sum an lak luh miau chuan kan ML* te ang lo takin term khatah (5yrs) 150% vel chuan an hausakna a pung hman bik hauh lo ang a. Thik tur an awm chuang lo ang.
.
I pasalte sorkar-in chhungkaw tin hnena sem a tum nuai khat lah hi in party-a luh ve phawt loh phei chuan dawn ve a harsa fu lehnghal a. In pa te party mi leh sa nih ve loh a, sawhthing ching nih bawk si chuan Sorkar siam addhaar card hlaua kohhran chhuahsan daih lawi, sorkar chhuahsan leh chuang si lo te nen awmzia kan neih loh dan a inang reng. Sum lak luhna tur a awm ve si lo a, Vaihlo bawk kan chin a ṭul leh ṭhin tih hi inthlahrung deuh tak siin ka sawi leh hram duh. 
.
NLUP hi thawk lova sum lakluhna ang hiala ka sawi khi ka lo uar hret a ni, min ngaidam teh. State dang leh ram dangin an rawn zir chian a, UNO hial pawhin a ngaihvena ṭha a ti tih an sawi; mahse, tu ram mahin an tih ve duh miah si loh NLUP vanga ram nghet, huan nghet neia thingtlang lo neih bansan ta lo neitu ka hriat tlem em vang a nia a thlawnin an dawng mai mai a ang ka tih chhan. NLUP dawng, hlawhtling si lo leh eirute hi a zung chawpin sorkar hian pho ro dawn ta se pho loh tur an tlem viau ten ka ring ṭhin. 
.

I pasal hnenah khan hei hi min lo hrilhsak nghe nghe ta che. "Kum 2008 kuma an sorkar tuk aṭanga sem policy a kalpui ṭan kha tun thlenga dawn chak ngawih ngawiha mi tam tak an party-a a la lawm lut hluah hluah a nih chuan a sorkar hnuaiah mipui an la rethei reng a, sum nuai khat zet mai ita mahni zahawmna pawh ngaihtuah thei lova siam an la ni tih hi,"
.
"Kan moral leh kan kawngpui chhia hi fur khat ruahin a nan chhiat leh hma hauha siam ṭhat a ngai tawh hle a ni tih pawh hi lo sawi tel nghe nghe la. Kawngpui chhia chu sum a awm chuan a siam theih mai a, mipui rilru puthmang ṭha tawh lo laklawh erawh sum a tam poh leh a chhe zual zel zawk dawn si a. Mipui rilru siam ṭhat hmasak te hi Pathian nung duh dan a nih ngei ka ring." Lalzoenga'n a ti lo ti nghe nghe ta che.
.
Heti hian lo zawt bawk teh a.
"Pa-a, thingtlang kuthnathawkho hi an thlai thar chin chhuahte laksakna tur in ngaihtuahsak a, an intodelh chuan NLUP hmangin an thlem theih dawn si lo a. Kan party-ah an luh loh in hlauh vang em ni hmangaih hmel deuha rethei tak sia in siam reng chhan hi?" tiin.
.
Vawi khat lehkhathawn atan chuan a sei ta mah mah e. Valentines Day dawn chauha inhmangaih thar thut nula leh tlangval (ka ten chi) an awm ṭhin ang hian inthlan dawn chauha mipui hmangaih thar party an awm ṭhin a, anni chu ni ve tawh lo hram turin in pa kha lo chah uluk nasa teh.
.
Sorkar hnathawk leh politician an hausak thur thur lai hian keini sorkar zem zen pha ve ta lo chuan Vaihlo tuina ram ṭha kan lo bawh zel rih ang a. Car man to chungah ni lo, kan Vaihlo tui hnungpuak chungin kan lo 'Hawi champ' zel rih ang e Khuangleng Vaihlo tui aia tui kan thar fuh hlauh phei chuan kan rawn zawrh ve phal lo zawk hial mai thei che a ni.
.
Tak a, thingtlang lo hal hun tur hi office hlim hnuaia coat suit nena ṭhu ṭhinte ai chuan a lo neitu, Mangkhawh hnathawh thawmhnaw inbelte hian an hre zawk feeeeee a ni tih hi Vaihlo i sawi mawi loh pahin lo sawi tel zeuh ṭhin teh a.

I hriat ngai loh Vaihlo tui hre tak mai,

Lalzoenga
Vawksa Street Irregular

(Kan dahtha ve mai a ni e)

Post a comment

Powered by Blogger.