REANG (BRU) REFUGEENimin khan M.K Singla MHA Adviser N.E leh Addl. Secretary Home Pu Lalbiakzama hovin Mamit, Lunglei, Kolasib leh North Tripura District Magistrate, Addl.DC Mamit, Mamit leh Lunglei SP, OSD Home Deptt. Kolasib SDPO, Mizorama tlawmngai pawl lian ber YMA hotute bakah Mizoram Bru Displaced People Forum ( MBDPF) hotute chuan Tripura Refugee Camp-a Reang (Bru) awmte an lokir leh ngei theihna turin confidence building measure atan inkawmhona Refugee Camp hrang hrangah neih a ni.


Refugee Camp-a Reang (Bru) awm mekte hi Mizoram District 3, Mamit, Kolasib leh Lunglei District chhunga khaw hrang hranga lak kir tura ruahman a ni a. Central Sorkar atanga tanpuina an dawn tur ang angte pawh ruahman tawh niin Mizorama let chhungkuate hian Sorkar laipui atangin in sak tanpuina Rs 130000/- leh Financial Assistance Rs 5000/- kum hnih chhung thlatin an pek dawn bakah Free Ration Buhfai athlawnin kum hnih chhung an dawng dawn bawk a ni.

Reang (Bru) raltlante hi Kum 2016 khan Mizoram mi leh sa dik tak an nih leh nih loh tichiang turin Camp 6, Kaskau, Khakchangpara, Hamsapara, Asapara, Naisingpara, Hazacherra-ah te Identification neih a lo ni tawh a. Chung Identification tih tawh chhungkua, rawn let duh ngei turte chu Re-Identification tih leh tur niin hemi a kir leh duh tak tak turte chu Mizorama hruai haw an ni dawn a ni.


Bru raltlante an raltit lohna tur hian Central YMA aiawhin Peter Chhakchhuak, Asst Secy, Pu Zochhuana, CEC, Sub Hqrs YMA Mamit aiawhin Pu Zatluanga Sailo, President leh Pu C.Lalduhawma, ECM bakah Mizoram chhunga Bru Coordination Committee aiawhin Pu Elvis Chorky, Chairman leh Pu Vanlalzawna, Asst. General Secy te an tel a ni.

Bru Mizorama lokirte tan hian an kirna tur Village Council-te chuan in hmun leh huan thlai an siamna tur ram an pe dawn a. Heng bakah hian Sorkar tanpuina hrang hrang Job Card, Ration Card siamsak an nih dawn bakah Sorkar tanpuina an dawn theihna turin a theih ang anga NLUP pawh ngaihtuahsak an ni dawn a ni.

Reang (BRU) lokirte hi Mamit District khaw 48-ah leh Kolasib District khaw 10 bakah Lunglei District khaw 4-ah te dah an ni dawn a ni.-DIPR

Post a comment

Powered by Blogger.