Mizoramin kawlphetha lei nan thla tin Cheng vbc. 25 chuang a hmang ṭhin
Power & Electricity secretary H Lalengmawia hoin nimin khan Lunglei Circuit House-ah P&E Lunglei Circle hnuaia thawktu te, Chhimbial Chhantute leh contractor-te an ṭhukhawm. He hunah hian, Mizoramin kawlphetha leina atan thla tin cheng vbc. 25 aia tlem lo a hman ṭhin thu an tarlang.
Mizoram State Power Dinhmun: P&E Secretary chuan, Mizoramin kawlphetha a mamawh san lai berin megawatt 100 a mamawh thu sawiin, "Tualchhunga siam chhuah hi megawatt 10 vel a ni. Kan power mamawh hi state páwn aṭangin kan lei ṭhin a, a lei nan thla tin cheng vbc. 25 aia tlem lo kan hmang a. Mi tinin renchem takin power hi hmang ila, electric hmanrua kan leiin energy hmang tlem zawk, êng ṭha bawk si LED hi mi tinin hmang thei ila nasa takin sum kan sên tlem phah ka beisei," a ti.
Mizoram pumah thingtlang khua êng la pek lohte chu February 2018 chhunga pek vek tum a nih thu sawiin H Lalengmawia chuan, "Tun hma hun rei deuh tawh aṭanga êng pek tawh, khuarel chhiatna vang leh enkawl ṭhat tâwk loh vanga êng leh ta lo khuate pawh êng pe leh turin theihtawp chhuah mek a ni," a ti a; Chawngte area leh Siaha district-a êng nei tawh ṭhin, tuna nei ta lote'n an neih leh theih nan department leh contractor-te'n hma an lak mek thu a sawi.
P&E chief engineer Lalramliana tarlan danin, 132Kv Melriat - Lunglei line chu 80% thawh zawh tawh a ni a, hna a chak theih nan ban phunna hmun atan ram pe turin ram neitute ngen an ni.
33Kv sub-station thar Buarpui, Saiphai leh Khawbungah siam zawh a ni tawh a, Lawngtlai leh Siaha-ah sub-station bunna atan tender chhuah mek a ni. Lungsenah 132Kv sub-station thar siamna tur work order pek a ni tawh a, 25MVA 132/33KV power transformer lian bun tura hna ṭan mek a ni.-Vanglaini
Post a Comment