CM-in college building leh stadium a hawng
Zawlnuam College : Rastriya Uchchatar Shiksha Abhiyan (RUSA) hnuaia Zawlnuam College building sak thar leh Kanhmun khuaa indoor stadium sak thar chu, nimin khan chief minister Lal Thanhawla'n a hawng.
Lal Thanhawla chuan, Mizoram sorkarin quality education a ngai pawimawh tih sawiin, "Mizoram hmun hrang hrangah RUSA kaltlangin college thar leh a hlui thawm ṭhat mek zel a ni," a ti.
Mizoram sorkarin zirna a ngaih pawimawh avangin India rama 27-na turin Mizoramah Sainik School hawn a nih thu sawiin CM Hawla chuan, "Hmeichhe zir theihna bikah phei chuan India rama awm chhun a ni," a ti a; Sainik School chu nunphung pangngai taka naupang chherna hmun a nih thu a sawi.
Tun hma chuan Mizo zingah ram páwn déng chhuak officer lian tak tak an awm ṭhin thu sawiin Lal Thanhawla chuan, ṭhangtharte zingah tun aia central service-a inziak tling tura ṭan la thar sauh sauh turin zirlaite a fuih.
Chief Minister chuan, Mizoram sorkarin mipui hriselna a ngaih pawimawh thu sawiin, "Mizote hi zûk leh hnuam, ei leh inah kan invawn thianghlim a ṭul tak zet a. Zûk leh hnuama kan fihlim loh lutuk avangin kan hmel kan tibâl ṭhin a ni," a ti a; hriselna leh zahawmna atan zûk leh hmuam laka fihlim tum turin kalkhawmte a chah.
Zawlnuam College hi kum 1986-a din a ni a, kum 2007 khan sorkarin a la (provincialise) a, kum 2016 khan NAAC accreditation a hmu a, zirlai 50 an awm mek. College building thar hawn tâk hi a dung ft. 83.5 leh a vâng ft. 26.5 a ni a, cheng nuai 70 senga sak a ni.
Chief Minister hi minister John Rotluangliana, MLA pahnih - Lalrinmawia Ralte leh Lalrobiaka bakaa, Mamit DC Lalbiaksangi ten an ṭawiawm.-Vanglaini
Post a Comment