Vawiin khan Chaltlang Tourist Lodge-ah Chaltlang leh Durtlang inkal pawhna tura ruahman ropeway lungphum Tourism Minister Pu John Rotluangliana’n a phum a. He programme-ah hian Aizawl North I Bialtu MLA leh Higher & Technical Education, Art & Culture etc Minister ni bawk Pu R. Romawia chu khualzahawm niin Dy. Speaker Pu R. Lalrinawma pawh he hunah hian a tel a ni.
Tourism Minister Pu John Rotluangliana chuan Chaltlang-Durtlang ropeway chu Mizoram-a ropeway hmasa ber a nih tur thu a sawi a. Fimkhur leh uluk taka ropeway chu siam a nih tur thu a sawi a. Mizoram hi ram pawn atanga lo kal reng rengin boruak a nuamin state mawi tak a nih thu an sawi thin a, mahse heng khualzinte hruaina tur hi a vang thin hle a ni, a ti a. Mizoram hmun hrang hrangah khualzinte hip thei tura hmalakna a awm thu sawiin Thenzawlah Golf-Course siam a nih mek thu leh Sakawrhmuituai tlangah sky-walk siam tura ruamhmanna a awm thu a sawi a. Heng project-te hi sawrkar laipui bultum an nih thu a tarlang a. Chaltlang NGO-te hnenah chuan neitu nihna thinlung pu turin a chah bawk a ni.
Khualzahawm Pu R. Romawia chuan thu sawiin ropeway chu mipui hipna atana ruahmanna tha tak a nih thu a sawi a. Durtlang Synod Hospital pan duh tan pawh reiloteah a thlen theih thuai tawh dawn a ni tiin thalaite tan tuallenna tha tak a ni ang, a ti a. Kawng hrang hrang-ah mipuiin an hlawkpui ngei a beisei thu a sawi bawk a ni.
Ropeway hi Chaltlang leh Durtlang inkal pawhna atana ruahman niin a sei zawng hi 2.23 kms a ni dawn a. He ropeway hi Asia ram pum puia a dawmtu ban awmlo (single unsupported span) ropeway sei ber leh hemi category i.e single unsupported span bikah hian khawvel puma sei ber pathumna a ni dawn a, mi 24 chuan theihna niin single trip time hi 8 mins a ni ang. Leading Edge Pvt.Ltd chuan ropeway siam hna hi an thawk dawn a ni. Chaltlang-Durtlang ropeway hi sawrkar laipuia Ministry of Tourism Swadesh Darshan project pakhat Eco-Adventure Circuit hnuaia hmalakna niin he project in a tum ber chu Mizorama hmun hrang hrang ( Khawhpawp, Lengpui, Chaltlang, Sakawrhmuituai tlang, Muthi, Hmuifang etc) khualzin leh mipuite hipna atana siam leh thuam that a ni.
Tourism Department Secretary, Pi Esther Lalruatkimi chuan programme hi a kaihruai a. Leading Edge Pvt.Ltd atangin ropeway project report ngaihthlak a ni a. Tourism Department Director Pu Biakthanmawia Pautu chuan lawmthu sawina in hun a khar a. Tourism Department thawkte leh Chaltlang YMA, MHIP leh MUP-te an tel a ni.-DIPR
Post a Comment