J.F. Laldailova (Master of English to Mizo Dictionary)

MIROPUITE CHANCHIN - J.F. Laldailova
  • J.F. Laldailova chanchin tlangpui :-
  • Hming - J.F. Laldailova
  • Pian kum - 1925, pawlkût thla ni 9, zirtàwp ní
  • Eizawnna - Chanchinbu enkawltu, ziakmi, ṭawnglettu
  • Thih kum - 1979, nikir thla ni 7, ningà ní
  • Chawimawina - Mizo Hla Kungpui Mual-ah seng luh a ni.
  • Hriat hlawhna - ṭhenkhatteṬawnglettu, Ṭawng thlitfimna, Thufiahbu siam


J.F. Laldailova(1925-1979) hi mizo ṭawng tihhmasawn leh tihrualkhai lama thawh hlâwk tak, Sâp ṭawng-Mizo ṭawng thufiahbu hman hlawh êm êm English-Lushai dictionary siamtu a ni. Ṭawng-lettu, thufiahbu-siam mi leh chanchinbu mi nih a fàwm a ni. 


Pian leh murna: Laldailova hi Mizoram Catholic Kohhran dintu Pu Peter Thangphunga leh Pi Saichhungi te fapa neih chhun niin, kum 1925, pawlkût thla ni 9 khan a lo piang a. Baptisma a chanin a kristian hmingah, Joseph Francis tih phuahin J(oseph) F(rancis) Laldailova tiin, hriat a lo ni ta a ni.

A naupan lai : Kum sawm mi lek a nihin, kum 1935 khan Chittagong-ah High School a lût a. Mizo dang awm ve lo mah se, naupang tumruh mi a nih avangin, chhel takin a zir a. Ṭum 22 exam a beihah ṭum 17 pakhatna a ni. Sâp ṭawng thuhla ril-a a tui avangin, Mizo ṭawng hloh vek khawpin a zir a. Indopui II-naah sikul khar a nih avangin pawl 8 thleng chauh a zir a. Mizo rama a lo kir lehin Mizo ṭawng a hranpain a zir leh a. Mizo ṭawng pawh ani tluka duhtui leh thiam an awm lo ang tih khawp hiala thiam a ni leh ta mai a ni. 


Hna dil : Mizorama a lo chhuah hian an chhungkua an harsa hle a. Chutih lai chuan Boys’ M.E.School-ah 93rd Brigade an inkulh a. Peon hna thawktu tur an duh tih hriain a panen an va dil a. Major-in a sap ṭawng thiamzia a hriatin, "Sap ramah hetiang hi tirhchhiahah kan hmang ngai lo, lehkha zirtir leh zawk rawh u," a ti a. Mahse, an inchhungin a tlin miau si loh avangin a chhunzawm thei ta chuang lo va. Royal Air Force a zawm a. Rimawi a ngainat avangin, tawtawrawt ham a zir a, a thiam hle. Band Master a ni pha hial a ni. 


A kutchhuak lam : Lenkhawm hian a lung a tileng thei em em a; Chheih zai leh Tlanglam zaite pawh a thiamin, a ngaina a ni. Lehkhabu lehlin lamah ei zawngin,Thu ngaihnawm bu leh Chanchin bu a enkawl a. Baibul lehlina a famkim lo lai leh duhthusam lo laite huaisen takin, a sawisel thin. Mizo-English Dictionary leh English-Mizo Dctionary a siam a. Tun thlengin zirlaite tan a ṭangkai em em a ni. Mizo zirlai tam zâwkte sâp ṭawng zir ṭanna hnar ber pakhat a ni. Hun hnuhnüng Kum 1978, khuangchawi thla khan hrisel lohna a neih tak avangin, Dibrugarh leh Silchar-ah te a inentir a. Dibrugarh damdawiin aṭangin dam ṭha angreng takin kum 1979, vau thla ni 12 khan a lo häwng a.Mahse, rei vak lo hnuah Civil Hospital-ah thla khat zet a awm a. Kum 1979, ṭomir thla ni 24-ah beidawng takin mahni in lamah a häwng leh a. 

Kum 1979, nikir thla ni 7, zing dar ruk-ah William Shakespeare-a ṭawng kulmût pui pui pawh Zoṭawng nalh taka Zofate lehlinsaktu, zirlaite thufiahbu rintlâk taka chawmtu chuan he khawvel hi a chhuahsan ta a ni.

Source: Click here

Post a comment

Powered by Blogger.