Mizoram Bru Displaced People's Forum (MBDPF) chuan sorkar laipuiin an chunga khauh taka ro a rel avangin mipuiin lungawi lohna lan tirah sorkar an vau.
MBDPF chuan nimin khan he thu hi sawiin Bru relief camp zawng zawng khar veka a thlawna ei tur an dawn \hinte pawh tihtawp vek tura sorkar laipuiin thutlukna a siam chu an duh lo hle tih an tarlang a. An pawl hruaitu pakhat Bruno Msha chuan Mizorama lalet leh tura ruahmanna awm kan pawm lo a nih chuan tiin sorkar laipuiin na takin a vaukhan niin a sawi a. A sawi dan chuan Agartala atanga km 170 vela awm North Tripura district chhunga Kanchanpur Sub Division-ah hian relief camp 6 awmin mi 35,000 vel chu kum 21 zet an awm tawh a ni. Vawi sarih lai laklet hna thawh a ni a, chhungkaw 1,600 vel chu Mizoramah an kir leh tawh a. Mahse, MBDPF hian kir tura sorkar ruahmanna tipuitling turin thil ngiat neiin an dodal mek a ni.
Union Home Ministry hotu lawk pathum - Special Secretary, Internal Security Rina Mitra, Adviser (North East) (Bru) Mahesh Kumar Singla leh Joint Secretary Satyendra Garg te chuan Zirtawpni khan Agartala-ah he'ng Bru hruaitute hi an hmu a. Home Ministry hotute hian Mizorama lokir Bru chhungkaw khat zel pek tur zat chu cheng nuai khat leh sing thuma tihpun sak an nih thu leh an kum hnih chhung a thlawna eitur pek leh chhungkaw tin thla tin cheng sang nga pek an tum thute an hrilh a. Mahse, he an thil tiam hi duh lovin pawisa tam zawk pek an ngiat a. In sakna tur ram zau zawk bakah huan lo ram dinna tur acre nga a zau ram an ngiat a, chhungkaw tin cheng nuai sawm pek leh chhungkaw tina mi pakhat tal sorkar hna a thun leh Central Armed Police Force te venhimna te an ngiat a ni.
Tuna sorkarin a tiamna ang hi chuan Mizorama kir an duh dawn lo tih Bruno chuan a sawi a. Hetih lai hian Tripura sorkar chuan Bru ho kawl reng hi an duh tawh loh thu an sawi a. Tripura sorkara Principal Revenue Secretary Manoj Kumar chuan sorkar laipuiin relief camp a awmte chawmna tur sum an rawn pek chhuah mumal loh avangin relief camp enkawl kawngah harsatna an tawk niin a sawi.
Post a Comment