ASSAM POLICE-TE LAKA HMA LA TURA SORKAR LAIPUI KAR NAN, TLABUNG ȚHALAITEN PSE PISA LA KHÂR ZEL
Tlabunga țhalai rual intelkhawm - Tlabung Progressive Society-ten, Hailakandi DC leh Assam police-te hrem an nih ngei theihna tura hma la tura Sorkar laipui kar nan, Ministry of Home Affairs hnuaia hna thawh mek viltu Public Sector Enterprise-te pisa an khàr chhunzawm zel.
Vawiin khan Tlabung SDO (C) Pi V. Lalmuanpuii'n a chamber-ah Tlabung Progressive Society-te kàwmin, tun thla ni 20-a state sorkar pahnih aiawha chief secretary-te inbiakna ngaichang turin a ngen a; TPS-te thil tih chu hnam hmakhua ngaih vang a ni tih a hriatthiampui thu a sawi rualin, sorkar hotu lian zawkten ramri chungchang sawiho an tum tho avangin thil awmdan ngaichanga an hmalakna titawp rih turin a ngen a ni.
Tlabung Progressive Society-te chuan, SDO (C) ngenna chu zahawm an tih thu leh, state sorkar pahnih aiawhte an inbe tur chu lawmawm an tih thu an sawi a; nimahsela, Mizo pawisawi lote leh, Journalist-te laka tharum thawhtu Assam police-te leh, a thawhtirtu Hailakandi DC-ten an phu tâwk hremna an hmuh theihna tura Sorkar laipui chettir chu an tum ber zawk a nih thu an sawi.
Ramri-a hna hrang hrang thawh mek tihtawp te chu Mizoten a hrana an tawrh si loh, Sorkar laipuiin a ngaimawipawh si a nih avangin, sorkar laipui ațanga chhanna an hmuh hma chu kal zel an tum thu an sawi a ni.
Kum 2-a upa Tlabung Progressive Society hi Tlabung khawchhung veng hrang hranga țhalaiten, Tlabungin hma a sawn theihna tura hma latu atana an din a ni a; Tlabunga ATM booth a awm theihna tura India rama SBI hotulu ber chairperson an nawr hlawhtlin hnu-ah, Tlabung damdawi in sak țhat a nih theihna tur te, Tlabung khawchhunga department hrang hrang tlabal zel a changtlun theihna tur tein, mumal taka zirchianna nen hma an la mek a ni.
Hei bakah hian hmasawnna hna thawktu construction company-ten, Corporate Social Responsibility hmanga vantlang rawng an bawl theih nan theihtawp chhuahin hma an la a, Tlabung khawchhungah, Ministry of Home Affairs ruahman Civic Action Programme țangkai taka hman a nih theih nan hma an lo la tawh bawk. Hei bakah hian khawtlang nghawng thil hrang hrangah theihtawp chhuahin mipui hriattur an dapkhawm țhin bawk.
An pawl motto chu 'Tlabung tan' tih a ni.
Tlabung Progressive Society țanchhan te :
(i) Mizoram leh Assam inrina bula thil thleng kha ram pawna thil thleng (external affairs) a ni lo va, ram chhunga thleng (internal affairs) a ni. Chu chu eng ramah pawh Home Ministry emaw Interior Ministry emawkin chinfel a nih theih nan hma a la țhin.
(ii) Sorkar laipui a inrawlh loh chuan, kha thil thleng kha theihnghilh a ni zui mai dawn. Firfiakte ang maia Mizo pawisawi lo leh, hmeichhe journalist-te beitu Assam police leh, thu petu Hailakandi DC-te hrem an nih loh emaw, thupha an chawi loh chuan, nakina țhangtharten min la dem dawn.
(iii) Hailakandi DC bàn nghal rum rum emaw, police-te hrem nghal chuk chuk hi kan duh ber ni mah se, kan beisei ber a ni lo. Sorkar laipuiin, 'Kha thil thleng kha chhui a ni ang,' a tih emaw, 'A țul angin kan lo en zui ang' tih țawngkam tal a chhakchhuah kan phût a ni.
(iv) Tuna hna, a thawktuten an tawpsan mek te hian a hranpain Mizo mipuite a nghawng lutuk lo va, chutih rualin, central sorkar tan chuan pawimawh tawpkhawk si a ni. Hetiang hmanraw remchang leh karfung țha hmanga central sorkar kar chêt hi kan tum a ni.
(v) Ramri-a awm Mizote hi ram leh hnam thlavang hauha theih ang tawka ke pên ve țhin kan ni. Chutih rualin, hmasawnna kawng zawh thei lo tura ngaihthah kan nih reng zel chuan, eng tikah emaw chuan, he hnam thlavang hauhtu tur hi ramri-ah Mizo kan awm tawh lo palh ang tih a hlauhawm hle a ni.
Issued by
Tlabung Progressive Society
Post a Comment