Mizoram sorkar leh HPC (D) hel pawl aiawhte Aizawla an inbiak hun atana naktuk ruat lawk chu Nilaini a neih zawk tura sawn a ni.
MIZORAM SAWRKAR LEH HPCD INBIAK

Home department Additional Secretary Pu Lalbiakzama hnen atanga thudawn danin HPC (D) palaite duhdan angin inbiak hun hi sawn a ni a. Tun tum hi political level-a inbiakna hmasa ber tur a ni a. Mizoram sorkar aiawhte hi Political Adviser to Chief Minister Pu Lalrinmawia Ralte MLA in a ho ang a, palai dangte chu Law Commission Chairman Pu John Siamkunga MLA bakah a hma a official level-a inbiak laia palai Home department official-te an ni ang.
HPC (D) palaite hnen atanga thudawn danin inbiakna a an aiawh tur hian mi 11 hming an rawt a. HPC (D) palaite hi an pawl working chairman Pu Lalthangliana Hmar-in a rawn ho ang. 
Kum 2016 August ni 10 atanga neih tan tuna inbiakna kal mekah hian Sinlung Hills Development Council (SHDC) thuneihna sang zawk pek chungchang chu an thupui ber pakhat a ni a. A hming pawh hi Sinlung Hills Council tia thlak rawtna a awm a. Hetianga kalpui tur hian Assembly-a dan thar siam tura duan a nih thu dawn a ni a. Inremna ziah fel theih thuai beisei a nih thu Home department atanga thudawn chuan a sawi.


HPC (D) hi kum 1994-a HPC leh Mizoram sorkar inremna duh lova, ralthuam dah hnu-a rammu leh te kha an ni a. A tira dintu chu Lalhmingthanga Sanate a ni a, mahse, amah hi a tam zawkte’n hnawt chhuakin pawl hnihah an phel a. Sorkarin a biak mek hi H. Zosangbera kaihhruai a ni a. Lalhmingthanga Sanate hi hmanni lawk khan Zosangbera kaihhruai HPC (D) finance secretary Norbar Sanate thah a nih chungchangah Assam Police te’n an man.

Lalhmingthanga Sanate pawl pawh hi sorkar hian biak a duh a, mahse anni pawl hian Constitution Schedule parukna hnuaia autonomous district council hrang din an phut avang leh kil thuma inbiakna neih a sorkar laipui aiawh tel ve an phut avangin an inbe thei ta lo a ni.
Tuna inbiakna kal chhovah hian Hmar politics harsatna ching fel tura inremna neih ngei an beisei thu a tawn tawnin an sawi a ni.

AIR NEWS Aizawl

Post a comment

Powered by Blogger.