Mizoramin semifinal an lut
Santosh Trophy vawi 72-na semifinal lut hmasa ber chu Mizoram an ni.
Inrinni tlai khan Lalsangzuala Hmar hote hian Lalremruata goal hnih hmangin Punjab 2-1 in an hneh a, match khat khelh hmabak la awmah a chhe berah pahnihna an ni chiang tawh.
Group B inkhel dangah Karnataka chuan Odisha 2-1 in an hneh a, pahnihnaah invawrh chhoin anni hi Mizoram khelh hmabak an ni.
Vawiin hian group B ten match an khel dawn a, Mizoram erawh an awl dawn. Howrah Stadium-ah Punjab leh Karnataka te an inkhel dawn a, he inkhel result hian Mizoram hnung zui tur a hril dawn. Rabindra Sarobar Stadium-ah Goa leh Odisha te an inkhel ang.
An kaltluang
Mizoramin tun hnaiah Punjab lakah result ṭha an nei lo a, hei vang hian Howrah Stadium-a an intawn ṭum pawh hian rinkai zawka dah theih an ni lo. Punjab lamin bul an ṭan ṭha nghal a, chance ṭha ṭum hnih nei nghalin goal-ah an chantir thei lo ve ve.
Sanga hote an buai phah lo a, leiah ball dahin an inpe kual ngam a, a rah an seng nghal bawk. Minute 7-naah Tuikual North tlangval Remruata chuan goal hmahruai a khung a, hemi goal luh theihna tura Mizo player-te ball an inpe kual ṭha hle.
Captain Lalrinchhana'n tlarhnunga Punjab player-te ball a chhuhsak aṭangin a inṭan a, Lalromawia, Lalbiakhlua leh F. Lalrinpuia te chuan passing game hmangin Punjab thlarhnung an ṭhiat a, Valpuia ball ball vawrh luh chu Biaktea'n woodwork pet per nan hmang mah se a per chu MS Dawngliana chang fuhin Remruata tan a pe leh a, Tuikual North tlangval hian awlsam takin a khung.
Mizoramin an nawr chhunzawm a, Punjab tlarhnung an insiamrem hman lo. Mual vei lamah Bawngkawn tlangval Dawngtea'n amah aia lian player-te a bum hnuah box chhunga ven loa awm Remruata chu hmu fuhin Ramhlun North FC forward hian minute 9-naah a goal hnihna a khung.
Long ball leh palian
Punjab-in minute 56-naah Mizoram an vaw let fuh a, substitute Baltej Singh-a thawhrah sengin Jitender Rawat chuan Mizo defender a bum hnuah cool takin a khung a, an phur phah.
Kuldip Singh-a hoten a naute lenna hmang ṭangkaiin long ball an vawrh nasa a, an striker feet ruk leh inches sarih zeta lian chu chhawr ṭankai a tum hle. Mizoram keeper Lalṭanpuia'n hna nei lo mah se Sanga hote nuamsain an awm lo.
Mizoram an ṭang tluan a, injury time-ah Republic Veng tlangval Valpuia'n penalty a hlawh chhuak. Rawlthar duhawm Lalmalsawma huaisen takin rawn pen chhuak mah se Punjab keeper Moses Anthony-a'n a dan sak a, result erawh a danglam phah lo–Sanga hoten point thum an hlawh chhuak.
Vawi 5 an chak ta
Mizoram hian Santosh Trophy qualifier-ah Arunachal Pradesh leh Assam te chu Lammualah an hneh a, inkhel pahnih belhkhawm hian goal nga an kung a, goal an chhuah lo. Santoh Trophy kaihhnawih bik inkhelah chuan match nga chhung a zawnin an chak ta.
Kolkata-ah a zawnin vawi thum an chak ta - inkhelh thiam state Goa chu 3-1 in an hneh a, Odisha chu 5-0 in an sawp hnuah Punjab 2-1 in an hneh. Mizoram result-ah hian lawm lohna tur a awm a nih chuan an tlarhnung pawp chiah hi sawiselna tur a awm.
Thlen china hmasawn
Mizoram manager Hmingthansanga chuan, "Kan tum hmasak ber chu nikum aia hmasawn a ni a, nikum khan semifinal kan thleng. Tunah pawh semifinal kan thleng leh a, hmasawn kan duh a nih chuan final chu kan tum tur a ni," tiin Vanglaini a hrilh.
An result chungchang sawiin Hminsanga chuan, "Goa nen match hmasa ber kan khel a, coach ṭha leh player ṭha an nei chunga kan hneh khan kan team-ah phurna nasa tak min pe a ni. Semifinal thlen pawh hi hlawhltinna a ni a, kan result-ah kan lawm hle a ni," tiin a sawi.
Mizoram hian kum 2014-a an champion hnuah final lut leh tawh lo mah se kum li chhunga semi final an thlen vawi thumna a ni.
Mizo club Aizawl FC-in I League an khel tawh a, Mizo player ṭhahnem takin I League leh Indian Super League khel mah se player ṭha an rawn chhuak zel - chu'ng zinga mi chu Samlukhai rawlthar Lalromawia leh Tuikual North tlangval Remruata te hi an ni.-Vanglaini
Post a Comment