Vawiin ni 23.3.2018 (Zirtawpni) hian Pu Zoramthanga President, MNF chu sawm a nih angin 'Chapchar Kut' Tahan (Myanmar)ah Khuallian niin hun a hmanpui.

Tahan Chapchar Kût-ah Pu Zoramthanga Khuallianah A TangChapchar Kût khuallian MNF President, Pu Zoramthanga chuan, "Chapchar Kut hmanpui tura min rawn sawm hi lawmawm ka ti a, loh theih lohna avangin international border-in min daidan rih a. Amaherawhchu Culture, Society, Sakhua leh Economic-ah leh kawng hrang hranga kan inlaichinna leh thisena thlahkhat kan nihna hi engti zawng mahin a danglam dawn lo va. Myanmar sorkar-ah hian India sorkar puihnain Zofa unauten hmasawnna chak zawk in neih theih nan in khawsak dan/zia rawn hrechiang turin ka lokal a, harsatna hrang hrangin min nuai velna karah awm rih mah ila India, uBangladesh leh Myanmar-a Zofate hi thukhat vuain engtik hunah emaw chuan ram khatah kan la awm ngei ang tih ka beisei tlat a. Chumi atan chuan beih pawh kan bei dawn a ni. Hnam neituten Muzoramah thuneihna kan neih leh hunah Zoram hmel thar a lo lang dawn a, chumi zâr chu Zofa hmun hrang hranga chengten an zo ang. Myanmar nena Mizoram kan inkalpawhna pawh hi MNF kan sorkar chuan ngaih pawimawhah kan nei dawn a. Tun aia inkawlpawhna kawngpui țha leh awlsam kan ngaihtuah dawn a. Amaherawhchu tunah rih chuan in awmna sorkar-ah rinawm takin lo awm zel rawh u," tiin Pu Zoramthanga chuan a chah a.



Kût Pa, Pu Zoramthanga chuan, "Mizoram lamah Congress hruaitute'n Mizo hnam thinlung (Nationalist) pûte heng - Mizoram, Tripura, Assam, Manipur, Myanmar leh Bangladesh-a Zofa chengte rilru hi an hmu a, chu Mizo Nationalism hmalam pana kal vung mek hi hman leh tunah min chhutchhiatsak an tum reng a; Indian Nationalism leh Mizo Nationalism hi a indo reng dawn a, chumi atan chuan kan țanho lehzual a pawimawh a ni," a ti bawk.

Tahan Mizote hian Chapchar Kut an hman ṭhin hi chhan hrang hrang avangin hun engmaw chen an hman theih loh hnuah, kum 2003 aṭang khan Kut hi an hmang leh thei a ni.

Pu Zoramthanga hian Myanmar-a Zofate chenna hmun hrang hrang - Rangoon, Naypyidaw, Mandalay-te bakah, Myohla leh Hakha-te a tlawh a. Hakha-ah hian Chin State Chief Minister Pu Lianluaia nen inkawmna hun ṭha tak an nei thei a. Falam-ah riakin, Tedim leh Khampat, Kanan, Hmunṭha leh Zohmunahte hun a hmang bawk. Pu Zoramthanga hi Zofaten an lo lawm thiam hle a. Ngaihhruina thilpek chi hrang hrang an lo hlan bawk.
Tahan Chapchar Kût-ah Pu Zoramthanga Khuallianah A Tang
MNF President hian Tahan Theological College tlawhin an hotute nen inkawmna hun țha tak an nei thei a. Tahan 'Thutak Nunpuitute Team' (TNT) Branch pawh tlawhin țanpuina pawisa fai a hlan bawk.

Tahan Chapchar Kut, Mizo Welfare Organisation-in an buatsaiha khuallian Pu Zoramthanga zin hi Pu Rosangzuala Adviser, Pu Ramthanmawia General Secretary, Pu Lalrintluanga Sailo Gen. Secy leh Hqrs. hruaitu rual mi ṭhahnem takin an ṭawiawm.


Media & Publicity Dept.
Mizo National Front

Post a Comment

Powered by Blogger.