- James Ramdinmawia
Mizoram University Students' Union (MZUSU) hruaitu kan nih ve lai khan Vice Chancellor thar kan nei a. Amah chu 'Vai' a ni a, 'Hindu' a ni a, 'Brahmin Pachal' tiin an sawi hial nghe nghe. Zirlai Pawl te leh Political Party thenkhat leh mi tam tak khan 'Mizo zingah VC tur qualified Professor kan nei ve reng a, Vai an rawn dah hi kan duh lo' tiin nasa takin an lo dodal a, a Sakhuana thleng khan an hnualsuat a nih kha. Chutih laia MZUSU ngaihdan ve thung chu 'Vai an ni emaw, Mizo an ni emaw, hnamah leh sakhua-ah kan buai lo, MZU VC atan chuan mithiam chungchuang, mi chak, mi dik, mi rinawm, nasa taka MZU hmasawnna thlen theitu tur mi tha kan duh' tih hi a ni.
Chutichuan kan VC thar kha a background te kan han zirchiang a, kan duh ang mi ngei nia kan hriat avangin lungsi takin kan lo welcome a nih kha. Mi tam takin MZUSU kha 'hnam rilru pu lo' tiin an dem rawn luai luai a. Mahse kha VC thar kha Mizopa Registrar viak tha tak mai nen an inkawp fuh hlauh nen, kum 5 chhung lekin MZU chu India rama Central University hmasawn ber te zingah an hlangkai hman a, Administrative & Financial Reforms nasa takin kan hmu a, kum naupang te ni siin MZU chuan NAAC Accrediation-ah 'A' Grade a hmu ta hial a, tisual kan inti lo. Kha Vaipa term a lo tawp khan Mizo mipuite duh ang ngeiin Mizopa (Kristian) ngei VC kan han nei ve ta, mahse hmasawnna chu a muang ta raih mai, helam chu ka sawi thui lo ang.
Kan State Politics pawh hi han thlir ila; Kristian Pa, Mizo Pa, Kristian te duhsaktu ngei Political Party thlan hram hram kan duh a, chumi kawngah chuan kan Berampute pawhin thawm an chhuah nasa ngiang mai. Mahse UT kan nih atanga vawiin thlengin Mizo Kristian Politician te'n ram an hruai a, an corrupt em em a, ei leh bara intodelh chu sawi lo, Delhi Drip khai bak a aia thui hma min sawn pui thei lo a, an term chhunga hmasawnna lian tham min chhawpchhuahsak awm mang si lovin inthlan dawna ‘Sum’ tawktarh politics min barh lui a, mipui rilru thlengin a hlemhle a, kan moral an tichhe vek a, kan thlarau nun thlengin a nghawng a nih hi. He kan chhungrila min eichhetu bawk (tumour) lian tak awm hi do phal si lova ‘Hindutva’ ringawt insawithaih reng mai hi chu kan Berampute pawh hi tute emaw ‘Political Game’-ah chuan an tawlhthlu chiang a ni.
Politics-a kan zawn ber chu Sakhua-na ni lovin mipui hamthatna (welfare) leh hmasawnna (development) a ni. Hmasawnna rawn zuar theuh theuh, sum rawn tawktarh theuh theuhah hian tu nge hmasawnna tak tak thlen tura hma la theia hma la thin, tu nge corruption do ngam, tu nge systematic change rawn thlen thei tih hi kei chuan ka thlir ber a ni. Central Sorkar leh State hrang hrang Sorkar-a hmasawnna leh thil diklo do-a an chet dan te pawh thlir zau ve zel ila a tha khawp mai. Eng Political party-ah pawh, eng pawl leh Society-ah pawh Member ni ila ka Sakhua-na hi chu thil hran daih a nih avang leh ka Lal leh Chhandamtu-ah Isua ka pawm tlat avangin a nghing ngai lo ang. Kan Berampute’n Political Party dang bei phal si lova BJP an bei ngat ngat mai hi ka hrethiam thei lo, an rinna a derthawng nge, an beramte an ring zo lo nge, Pu Hawla game an man lo zawk?
Mizoram-a kan Regional Party te chu sawi lo ta ila, National Party pahnih kan neih hi Kristiante tan an hlauhawm em, an thlamuanpuiawm em, tih hi i han zir chiang teh ang. Kum 2002 kuma President of India thlan a lo hun khan BJP kaihhruai NDA Sorkar lai a ni a, anni khan Rajya Sabha-ah Member an ngah tawk loh avangin Opposition Party lian ber rawn chunga Candidate siam an titlu a ni. Tichuan beisei loh lutuk maiin BJP Sorkar chuan India ram hotu lu ber, President of India atan Kristian pa, Dr. P.C. Alexander-a kha an han rawt ta khauh a. India rama Kristiante tan chuan lawmthu sawia tawngtai nghal mawlh mawlhna tham a ni. Mahse Congress Party an han rawn ta a le, anni’n an lo duh ta tlat lo mai a. Chutah Muslim pa, Dr. APJ Abdul Kalam an han rawt leh a. Congress Party-in an lo pawmpui hnu-ah Abdul Kalam chu Candidate niin chiang takin a tling ta a nih kha. A khawi Party zawk nge Kristiante duhsak a, duhsak lotu chu? Tin Congress-in Kristian pa an lo reject hnu khan BJP ho chuan Hindu pa rawt ta chuang lo chuan Muslim pa an la rawt leh ta deuh deuh kha a ni a, rin ai chuan an rilru a zau mang e aw, ka ti thin. Kum 2012-a Kristian pa PA Sangma-in independent-a President of India a chuh pawh khan BJP kaihhruai NDA khan an thlawp leh ngat a nih kha. Congress Party-in India ramah kum 50 vel ro an rel chhung khan President of India atan Kristian pa an la chhawpchhuak ngai lo.
Tunhma Kristian tihduhdahna rapthlak tak tak thleng thin kha han chhui let ila, khang thil thlen hunlai kha an State-a Congress Sorkar lai a ni deuh fur. Mizoram, Kristian ram kan tiha Hindu / Buddhist (Chakma) Minister min barhlui ziahtu hi tu nge, eng Party nge, Lal Thanhawla leh a kaihhruai Congress Party an ni ziah. Heng te pawh hi kan Berampute hian khel ve sela. State dangte angin Mizoram-ah hian BJP rawn lian ta thutin, Sorkar-na hial rawn chang pawh ni se an MLA leh Minister zawng zawng deuhthaw chu Mizo pa, Kristian pa tho an ni dawn. Chumi avanga kan rinna leh kan Kristianna a derthawn kan hlau a nih chuan Kristian ni ve tlak lo kan ni tihna a ni mai. MNF hi Kristian based Political Party a ni, an sorkar laiin Congress mi leh sa ni ngar ngar thin Chakma ho kha MNF-ah an inlet dual a, CADC-ah pawh MNF Sorkar a ding hial a, mahse chimral an nih kan hre lo. MNF-a an inleh avangin Kristian-a an inleh dual kan hre lo. MNF khan tihluihna-in Kristian-a inlehtir pawh tum se Indian Constitution-in a humhim tlat. Chuvangin Sakhua-na leh Politics hi chu i dah hrang thiam ang u.
Mipuite hian hmasawn ve tak tak kan duh tawh a, State dang te kan enin kan rualawt a ni. Tuna Mizoram mipuiin kan thlakhlelh ber ni-a ka hriat chu eirukna do ngam, eiru lo ngam, a tak taka hmasawnna thlen tura thawkrim tur leh ngaihtuahna seng tur, Delhi Drip khai reng ringawt lo deuha State Sorkar intodelh siam thei, mipuite ei leh bara an intodelhna tura a taka hma la duh, thingtlang kuthnathawktute khawpui mi awt lo khawpa an awm ve theihna tura hma la tak tak tur mihring leh Political Party a ni. Mipuite chan ai eiru reng chunga hmasawnna thlen chuang si lo, Pulpit tlanga lawn thei te hi kan mizawn an ni lo.
(Vanglaini dt. 10.3.2018 & The Aizawl Post dt. 9.3.2018)
Post a Comment