~ Ruatfela Nu
Ka chipui duh takte u, a hmasain in mi support thinna avangin ka thinlung takin lawmthu ka sawi e. Kan ram dik tak humhalh turin, hmeichhe pali kan kal a. Kan motor hmaah "United We Stand Devided We Fall" tih ziak banner kan zar a, a hnungah When You Go Home Tell Them Us "For Your Tomorrow We Gave Our Today. A tula thih huamin ani kan kal!
A tul chen chen cham turin leh Bairabi khaw mite tibuai lo turin eirawngbawlna thuk leh puan in (tent) kan keng a. Zana kan thlen vangin mi inah kan riak phawt a.
Tichuan zanlai pelah MZP in 14.3.18 a Zophai, Bairabia Zofate Chawlhbuk sa tura Hnam hnatlang a koh chu CYMA, MKHC ten thulh tura an ngen vangin a thulh thu kan hre ta. Palaite thuken pui ber chu- tunthla ni 20 ah state pahnih chief secretary te Delhi ah an inbe dawn a, nghah phawt tih leh thisen a luang nasa lutuk ang a, kan thi teuh ang...tih a ni awm e. Mizoram tana kan sakruang hlan kan tum chu dam luau-in kan lo let leh ta a ni. Heng Hnam hnatlang thulh chhan hi a thleng vek dawn tih MZP te hian an hre lawk lo em ni tih hi ka zawhna a ni.
A thuhrimah Thisen chhuak loin zalenna a awm thei lo. Keini pawh hi Lal Isua thisen chhuaka a thihna avanga sual lak zalen kan ni.
History kan en chuan hnam pasal tha ten thisen chhuaka an nunna an hlan thin vangin ram an nei a, hnam an ding chhuak thin a ni lo em ni? Engatinge "Thisen a chhuak nasa lutuk ang. Kan thi teuh ang" kan tih nem duai thin le? Pathian zarah damtein kan awm ang a, vawikhat chauh kan thi vek dawn! Zu leh ruihhlo vang emaw, natna hrang hrang vang emawa khum laizawla thih ai chuan mahni ram chhana thih chu a hluin kan chak zawk tur a ni lawm ni?
Kan ram leilung humhim tura MZP in Hnam hnatlang a koh tawh zet a thulh leh hi hun a kal leh deuh hma chuan sawisela fakna tur ka hre rih lo. Mahse muangleia mipui hmaa hnam hmangaih awmfahrana huk dum dum thinte hi a saseha dawizep tak an ni leh thin tih erawh chiang takin ka hte thung.
Kohhran ho tehreng pawh hi lei leh van inkara an palai hna hi ngawrh takin thawk zawk se, zu leh ruihhlo vanga pulh puk pukna te hi a ziaawm ang a, nawhchizuar kan intodelh vanga HIV/AIDS a India rama kan sang lawrlak pawh a tlahniam duai duai ang a, eiruk hmang pawh an tlem deuh tur. Heng hi kohhrante lo palai sekna tur a ni em tih hi ka hrethiamlo a ni. MNF zalenna sual hlawhchhamin kohhran ho ngenna avanga tlawm an nih thu an chhuanlam thin angin MZP hian kohhran ho tawngtaina hi a chhuanlam ve ang em?
Enge kan sawi tak ang? Kan ram leh hnam humhim tura hma lak a nihin kawng chanvea tawpsan a nih chuan a hlauhawm tawk chiah a ni ang tih hi ka ngaihdan a ni a. Hma kan la a nih chuan thih huama a tawp rat thlenga kal ngam turin kan thinlung hi huaisen se, palai aw nem emaw, thuneitute vauna emaw hian mi ti zamlo thin se ka va ti tak em!
A tawp berah chuan mahni ram humhim tura kum tamtak lo bei ngar ngar tawh, Bairabi khaw mipui an fakawm takzet a. Tuntuma thulh leh a ni pawh hi pawi an ti a, a nih nih ni tura harsatna hmachhawn an ngam! Alert renga awm an ning tawh bawk. Bairabi khaw mipuite zahna chibai ka buk a ni.
Thubelh: vawiin ka piancham 58 na min lawmpuitu zawng zawng hnenah lawmthu ka sawi a, malsawmna ka duhsak che u a, malsawmin awm ang che u.
Ka nau missionary, Garmurra atanga zanlai pela a thawhpuite nen Bairabi lama thih hlaua rawn tlanchhe duai duai pawhin ka piancham chibai min buk nan-"i pension tep tawh a, eng nge i tih ang' min tia, Lalpan kan ram leh hnam tana ka thih a remti loa, ka la dam zel a nih chuan kan khua Kelkangah ka pem let leh ang a, in tereuhteah lehkhabu ka chhiar ang.
Post a Comment